1 mln teńge: órtten qaza tapqan qazaqstandyqtardyń otbasyna kómek kórsetiledi
Almatyda hostelde órt kezinde qaza tapqan Qazaqstan azamattarynyń týystaryna 1 mln teńge kóleminde kómek beriledi. Bul týraly óńirlik kommýnkaıtsııalar qyzmeti brıfınginde Almaly aýdanynyń ákimi Aıdar Jaqybaev aıtty, dep habarlaıdy Kazinform.
«Qala basshysy Erbolat Dosaevtyń tapsyrmasy boıynsha órt kezinde qaza tapqandardyń otbasylaryna 1 mln teńge kóleminde qarjylaı kómek bólinedi. Buǵan deıin habarlanǵandaı, Almaty ákiminiń tapsyrmasy boıynsha ákimdik qaza tapqandardyń denelerin týystary kórsetken jerge, onyń ishinde elimizdiń basqa óńirlerine tasymaldaýǵa kómektesedi. Odan bólek, Almaty qalasy aýmaǵynda jerleý rásimin uıymdastyrýǵa tolyq kómek kórsetiledi», – dedi Aıdar Jaqybaev.
Ol sondaı-aq qaza tapqan sheteldik azamattardyń otbasylaryna da máıitti jerleý ornyna deıin tasymaldaýǵa járdem jasalatynyn aıtty.
Eske salaıyq, búgin Almatyda hostel órtenip, 13 adam qaza tapty. Qalalyq tótenshe jaǵdaılar departamentiniń málimetinshe, órt týraly habarlama 30 qarasha kúni saǵat 05:33-te túsken. Birinshi órt sóndirý bólimi shaqyrtý ornyna 7 mınýt ishinde jetti.
Órtten zardap shekken 2 adam qalalyq jedel shuǵyl kómek kórsetý aýrýhanasyna jetkizildi. Qalalyq densaýlyq saqtaý basqarmasynyń málimetine sáıkes, naýqastyń birine kómirqyshqyl gazynan ýlaný dıagnozy qoıyldy. Sondaı-aq 59 adam evakýatsııalanyp, 56-sy jaqyn mańdaǵy mektepke ýaqytsha ornalastyryldy.
Almatyda hostelde bolǵan órt týraly sońǵy málimetter myna jerde.
