1 mln azamat jasandy ıntellekt negizderine oqytylady
ASTANA. KAZINFORM – 5 jyl ishinde 1 mln azamatty jasandy ıntellekt negizderine oqytý josparlanýda. Elimizdiń 20 joǵary oqý ornynda tıisti bilim berý baǵdarlamalary engizildi. Bul týraly Úkimettiń baspasóz qyzmeti habarlady.
Prezıdenti Qasym-Jomart Toqaevtyń «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýyndaǵy bergen tapsyrmalaryn júzege asyrý sheńberinde Úkimet ekonomıkanyń turaqty damýy úshin negiz qalyptastyratyn tsıfrlyq tehnologııalardy engizý boıynsha qarqyndy jumys istelip jatyr.
Ony Premer-mınıstrdiń basshylyǵymen arnaıy qurylǵan Tsıfrlyq shtab úılestiredi. Búgingi tańda memlekettik qyzmetterdi tsıfrlandyrý, IT-ındýstrııa, jasandy ıntellekt, óńirlerdi ınternet baılanyspen qamtamasyz etý jáne taǵy da basqa salalarda turaqty progress baıqalady.
Jasandy ıntellekt: strategııadan júzege asyrýǵa deıin
Memleket basshysynyń tapsyrmasy boıynsha Úkimet jasandy ıntellekt ekojúıesin damytý boıynsha aýqymdy jumys istep jatyr. Birinshi kezekte tıisti zańnamalyq bazany qurýǵa kóńil bólinedi. Senatta tehnologııalardy qaýipsiz jáne tıimdi damytýdyń quqyqtyq negizderin qalyptastyrýǵa baǵyttalǵan «Jasandy ıntellekt týraly» zań jobasy qaralyp jatyr.
Bıylǵy qazan aıynda mańyzdy oqıǵa — ıdeıalar men ınnovatsııalar fabrıkasy bolýǵa arnalǵan halyqaralyq Alem.AI JI ortalyǵynyń ashylýy boldy. Munda ártúrli halyqaralyq kompanııalar usynylady. Alem.AI ǵylymı zertteýler, startaptar jáne JI salasyndaǵy halyqaralyq yntymaqtastyq úshin negizgi platforma bolýǵa tıis. Ortalyqtyń qyzmeti tsıfrlandyrý salasyndaǵy qazaqstandyq sheshimderdiń eksportyn keńeıtýdi qamtamasyz etedi, bul tehnologııalyq jáne ekonomıkalyq ósýge serpin beredi. Keleshekte Qazaqstan Ortalyq Azııanyń zııatkerlik habyna aınalýy tıis.
Sonymen qatar 5 jyl ishinde 1 mln azamatty jasandy ıntellekt negizderine oqytý josparlanyp otyr. Elimizdiń 20 joǵary oqý ornynda tıisti bilim berý baǵdarlamalary engizildi.
Ulttyq sýperkompıýter jáne JI platformasy
Qazaqstanda bıyl Ulttyq sýperkompıýterlik ortalyq — Alem.cloud iske qosyldy. Onyń múmkindikteri memlekettik organdar, ǵylymı ınstıtýttar, joǵary oqý oryndary, bıznes jáne startaptar úshin qoljetimdi.
Sýperkompıýter memlekettik qyzmetterde qoldanylatyn qoldanbaly JI-modelderin, sonyń ishinde úlken tildik modelderdi oqytý, JI agentterin ázirleý, derekterdi taldaý, mazmundy qurý jáne modeldeý mindetterin testileý úshin qoldanylady.
Sondaı-aq Memleket basshysynyń tapsyrmasy boıynsha Premer-mınıstr jetekshilik etetin Tsıfrlyq shtab quryldy. 200-den astam komponentter boıynsha aqparattyq júıelerdi ıntegratsııalaýdyń keshendi jospary bekitildi, bul eńbek shyǵyndaryn qysqartýǵa, qaıtalanýdy joıýǵa jáne memlekettik organdar jumysynyń tıimdiligin arttyrýǵa múmkindik beredi.
Derekterdi qorǵaý úshin barlyq memlekettik organnyń Aitu qazaqstandyq messendjerine kóshýi júzege asyrylyp jatyr. Azamattarǵa eGov, eOtinish, Aitu jáne taǵy da basqa qyzmetterge tipti uıaly baılanystyń nóldik teńgeriminde de tegin qol jetkizý qamtamasyz etilgen.
IT sektorynyń ósýi jáne startaptardy qoldaý
Otandyq kompanııalar usynǵan IT-qyzmetterdiń kólemi 2021 jyly 646 mlrd teńgeden 2024 jyly 1,74 trln teńgege deıin ósti. IT qyzmetteriniń eksporty 2021 jyly $60,07 mln-nan 2024 jyly $690,7 mln-ǵa deıin ósti. 2025 jyldyń birinshi jartyjyldyǵynda bul kórsetkish $515,5 mln boldy.
Astana Hub alańynda startaptar men IT-kompanııalardy qoldaý baǵdarlamalaryn júzege asyrý jalǵasýda. Búgingi tańda Astana Hub ekojúıesi 1832 kompanııany biriktirdi, onyń ishinde 465-i sheteldik kompanııa. Qatysýshylardyń tabysy 2025 jyldyń birinshi jartyjyldyǵynda 368,3 mlrd teńge boldy.
Qazaqstan InDrive, Netcracker, Playrix, Telegram jáne taǵy da basqa tehnologııalyq alpaýyttarmen belsendi yntymaqtastyq ornatyp keledi.
Memlekettik qyzmetterdiń onlaın-formaty
Memlekettik qyzmetterdi elektrondyq formatqa kóshirý jumystary jalǵasýda. Búgingi tańda memlekettik qyzmetterdiń 90,4%-y onlaın rejıminde qol jetimdi, al 1 448 qyzmettiń basym kópshiligin ınternet arqyly alýǵa bolady.
Qyzmetterdiń 90,6%-y smartfonnan qol jetimdi, bul úderisti azamattar úshin múmkindiginshe yńǵaıly etedi. Qaǵaz analogtaryn tolyǵymen almastyratyn tsıfrlyq qujattardyń 39 túri engizildi.
Aıta ketelik memorgandarǵa jeke mobıldi qosymshalar ázirleýge tyıym salynatyny týraly jazǵan edik.