1 myń mektepte PISA zertteýi júrgizilip jatyr
ASTANA. KAZINFORM – 18 qarasha men 25 jeltoqsan aralyǵynda elimizdiń 1 myń bilim berý uıymynda halyqaralyq PISA zertteýi júrgizilip jatyr. Oǵan 15 jasqa tolǵan 30 myńnan astam oqýshy qatysady. Bul týral Oqý-aǵartý mınıstrliginen málim etti.
Vedomstvo málimetinshe, zertteý dástúrli PISA ádisnamasyna negizdelgen jáne oqý saýattylyǵy, matematıka, jaratylystaný ǵylymdary sekildi fýnktsıonaldyq saýattylyqtyń negizgi daǵdylaryn baǵalaıdy. Sonymen qatar bul zertteý arqly bilim berý uıymdaryna syrtqy baǵalaý júrgiziledi. Onyń nátıjeleri oqýshylardyń oqý úlgerimine áser etetin negizgi faktorlardy anyqtaýǵa baǵyttalǵan.
«Mektepterge arnalǵan PISA zertteýi jyl saıyn júzege asyrylady jáne ár mektep boıynsha jeke esepter usyna otyryp, nátıjelerdi taldaýǵa múmkindik beredi. Bul mektepterge bilim berý sapasyn arttyrý baǵytyndaǵy strategııalar men baǵdarlamalardy ázirleýde mańyzdy qural bolady. Zertteý oqý oryndarynyń kúshti jáne álsiz jaqtaryn anyqtap, qajetti sharalardy qabyldaýǵa kómektesedi, osylaısha bilim berý protsesin jaqsartýǵa yqpal etedi», - - dep atap ótti Bilim berý salasyndaǵy sapany qamtamasyz etý komıteti tóraǵasynyń orynbasary Maıra Meldebekova.
Aıta ketý kerek, «Mektepterge arnalǵan PISA» zertteýin Ekonomıkalyq yntymaqtastyq jáne damý uıymy júrgizedi. Oǵan 2021-2023 jyldar aralyǵynda elimizdiń 2 200 bilim berý uıymdary qatysty.
