1 mamyrdan bastap jedel járdemniń jumys tártibi ózgeredi
ASTANA. KAZINFORM – Densaýlyq saqtaý mınıstrligi 1 mamyrdan bastap mobıldik brıgadalardyń jumys tártibi ózgeretinin habarlady. Dese de jedel járdem qalypty rejımde jumys jasaı beretini aıtyldy.
Vedomstvonyń málimetinshe, mundaı ózgerister jedel járdemniń kelýin uzaq kútý boıynsha shaǵymdarǵa baılanysty júzege asyrylmaq. Ári shuǵyl qyzmet jumysynyń tıimdiligin arttyrý maqsatynda emhanalar janyndaǵy jedeldiliktiń 4-sanatyndaǵy shaqyrtýlarǵa qyzmet kórsetetin mobıldik brıgadalar jumysynyń qaǵıdalaryna ózgerister engizip otyr.
— Bul ózgerister aǵymdaǵy jyldyń 1 mamyrynan bastap kúshine enedi jáne azamattardyń 103 nómiri boıynsha shuǵyl kómekke shaqyrtý quqyǵyn shektemeıdi, — delingen habarlamada.
Jedeldiliktiń 4-sanatyndaǵy shaqyrtýlar patsıenttiń ómiri men densaýlyǵyna tikeleı jáne yqtımal qaýip joq, patsıenttiń ómirine qaýip tóndirmeıtin, biraq medıtsınalyq aralasýdy qajet etetin jaǵdaılarǵa qatysty.
Sonymen, 1 mamyrdan bastap ne ózgeredi:
● emhanalardyń janyndaǵy mobıldik brıgadalar jumys ýaqytynda — 8:00–den 20:00–ge deıin jumys isteıtin bolady;
● ómirge qaýip tóndirmeıtin jedeldiktiń 4-sanatyndaǵy shaqyrtýlar (mysaly, joǵary qysym, temperatýra, jeńil jaraqattar) emhanalardyń jumys ýaqytynda MSAK mobıldik brıgadalaryna qaıta baǵyttalatyn bolady;
● 20: 00-den keıin jáne demalys kúnderi barlyq shaqyrtýlarǵa, sonyń ishinde 4-sanatqa, burynǵydaı, jedel járdem brıgadalary qyzmet kórsetedi.
Statıstıka kórsetkendeı, jedel járdem shaqyrtýlarynyń 50%-dan astamy jedeldiliktiń 4-sanatyna jatady jáne sozylmaly aýrýlardyń órshýine baılanysty.
— Mundaı shaqyrtýlar resýrstardyń jedel kómekke muqtaj, ómirine qaýip tóndiretin jaǵdaılary bar patsıentterge bara almaı qalatynyn moıyndaý kerek. Ózgerister júktemeni ońtaılandyrýǵa, kútý ýaqytyn qysqartýǵa jáne búkil JMJ júıesiniń tıimdiligin arttyrýǵa múmkindik beredi, — dep habarlady vedomsvodan.
Endi medıtsınalyq-sanıtarııalyq alǵashqy kómektiń mobıldik brıgadalary shaqyrtýlarǵa shyǵyp, patsıentterdiń úıine josparly túrde barýdy júzege asyratyn bolady. Bul azamattardyń densaýlyq jaǵdaıyn ýaqtyly baqylaýdy qamtamasyz etýge, ásirese sozylmaly aýrýlary bar patsıentterdiń jaǵdaıynyń nasharlaýyna jedel den qoıýǵa múmkindik beredi.
MSAK mobıldik brıgadalary 25 myń turǵynǵa bir brıgada esebinen qurylady. Olar patsıenttiń turǵylyqty jeri nemese bekitilýine qaramastan naqty kelgen jeri boıynsha jumys isteıdi.
— Qajet bolǵan jaǵdaıda mobıldik brıgadalarmen arnaıy baǵyttaǵy mamandar da birge bolady, atap aıtqanda balalarǵa kómek pedıatrdyń qatysýymen, eresekterge — patsıent jaǵdaıynyń sıpaty men aýyrlyǵyna baılanysty arnaıy mamandardy (kardıologtar, nevropatologtar jáne basqa dárigerler) tarta otyryp kórsetiletin bolady. Bul tásil joǵary sapaly ataýly medıtsınalyq kómek kórsetedi, — delingen habarlamada.
Jedel járdemdi shaqyrtý mehanızmi ózgerissiz qalady — 103 nómirin terý arqyly azamattar táýliktiń kez kelgen ýaqytynda shuǵyl medıtsınalyq kómekke qońyraý shala alady. Patsıenttiń jaǵdaıy ómirge tikeleı qaýip tóndiretin jaǵdaılarda jedel járdem brıgadasy aptanyń kúni men táýlik ýaqytyna qaramastan keledi.
MSAK mobıldik brıgadasynyń shaqyrtýǵa kelý ýaqyty — 60 mınýtqa deıin. Barynsha shuǵyl sanattar úshin mynadaı normatıvter: 10 mınýt — birinshi, 15 mınýt — ekinshi jáne 30 mınýt — úshinshi sanattaǵy shaqyrtýlar úshin kózdelgen.
Osy jyldyń birinshi toqsanynda Qazaqstanda jedel járdem qyzmeti 2, 1 mln-nan astam shaqyrtýǵa qyzmet kórsetti. Eń kóp ótinishter jedeldiliktiń 4-sanaty boıynsha tirkeldi-763 463 shaqyrtý, onyń 518 myńnan astamyna MSAK mobıldik brıgadalary qyzmet kórsetti. 1-sanat boıynsha shaqyrtýlardyń sany 104 443, 2-sanat boıynsha — 642 312, 3-sanat boıynsha — 574 580 shaqyrtýdy qurady.
Esepti kezeńde sátti reanımatsııa kórsetkishi 55,6%-ǵa deıin ósti, bul shuǵyl kómek kórsetý retindegi oń dınamıkany kórsetedi.
QR Densaýlyq saqtaý mınıstrligi shuǵyl kómekke muqtaj árbir adam úshin jedel medıtsınalyq kómekke shaqyrtý qoljetimdi bolyp qalatynyn atap ótti. Ózgerister júıeniń tıimdiligin arttyrýǵa, kútý ýaqytyn qysqartýǵa jáne barlyq deńgeılerde medıtsınalyq kómekti jaqsartýǵa baǵyttalǵan.
Eske sala keteıik, buǵan deıin jedel járdem qyzmeti ákimdikterdiń quzyretine berilýi múmkin ekenin jazǵan edik.