1-kýrs stýdentteriniń ústine sý quıǵan: Semeıde ákimshilik is qozǵaldy
Semeı qalasynda 1-kýrs stýdentterin qabyldaý keshin dúrkiretip ótkizip, halyqtyń mazasyn qashyrǵan 20 jastaǵy jigitke aıyppul salyndy, dep habarlaıdy Kazinform agenttigi.
Abaı oblystyq Polıtsııa departamenti baspasóz qyzmetiniń málimetine súıensek, túngi ýaqytta Semeıdegi stýdentterge arnalǵan jataqhananyń janynda jastar 1-kýrs stýdentterin qabyldaý keshin uıymdastyrǵan.
Qatty shyqqan daýystar jaqyn mańdaǵy úılerdiń turǵyndarynyń mazasyn qashyryp, olar polıtsııaǵa shaǵym túsirdi.
«Tártip saqshylary 20 jastaǵy uıymdastyrýshyǵa qatysty QR Ákimshilik quqyqbuzýshylyq týraly kodekstiń 437-baby 1-bóligine (jeke tulǵalardyń demalýyna jáne tynyshtyǵyna kedergi keltiretin shuǵyl qajettilikpen baılanysty emes shýylmen saǵat 22.00-den 9.00-ǵa deıingi tynyshtyqty buzǵany úshin) sáıkes ákimshilik hattama toltyrdy. Osy bap boıynsha jeke tulǵalarǵa 5 aılyq eseptik kórsetkish (17 250 teńge) mólsherinde aıyppul salynady», – delingen aqparatta.
Áleýmettik jelide taraǵan vıdeodan kóringendeı, jataqhanaǵa aldynda jınalǵan jastar bir-biriniń ústine sý shashyp jatyr.
Jalpy jyl basynan óńir polıtseıleri túngi tynyshtyqty buzǵany úshin 1500-ge jýyq adamdy ákimshilik jaýapkershilikke tartqan.
