1 qyrkúıekten bastap mektep oqýshylary jańa standart boıynsha tamaqtanady
ASTANA. KAZINFORM — Mektepte tamaqtanýdyń jańa standarty ázirlendi. Ol 2025 jylǵy 1 qyrkúıekten bastap eldiń barlyq bilim berý uıymynda kúshine enedi, dep habarlaıdy DSM basshysy Aqmaral Álnazarova.
Memleket basshysy óz tapsyrmalarynyń birinde búginde elimizde 1,7 mln oqýshy qamtamasyz etilip otyrǵan tegin mektep taǵamdarynyń sapasyn arttyrý qajettigin atap ótti.
— Biz mektep oqýshylaryn kúmándi sapadaǵy arzan ónimdermen tamaqtandyra almaımyz. Balalardyń tamaqtanýynyń halyqaralyq standarttaryna umtylý kerek, bul jas urpaqtyń densaýlyǵyna tikeleı áser etedi, — dedi Prezıdent.
DSM basshysy Aqmaral Álnazarovanyń sózinshe, mekteptegi tamaqtaný reformasy mınıstrliktiń basty mindetteriniń birine aınaldy. Ony júzege asyrý — eń aldymen balalardyń densaýlyǵyn, oqý jetistikterin jáne jalpy ál-aýqatyn jaqsartý úshin mýltıplıkatıvti áser beredi.
— Densaýlyq saqtaý mınıstrligi Bilim mınıstrligimen, beıindi otandyq jáne halyqaralyq sarapshylarmen birlesip, ǵylymı derekter men halyqaralyq usynymdardyń negizinde mektepte tamaqtanýdyń jańa standartyn ázirledi. Ol 2025 jylǵy 1 qyrkúıekten bastap eldiń barlyq bilim berý uıymdarynda kúshine enedi. Ókinishke qaraı, sońǵy jyldary biz balalardaǵy semizdik, II tıpti qant dıabeti, júrek-qan tamyrlary aýrýlary, tisjegi jáne allergııa jaǵdaılarynyń ósýin baıqadyq. Bul kóbinese teńgerimsiz jáne zııandy dıetaǵa baılanysty, — dedi Álnazarova.
Densaýlyq saqtaý mınıstri atap ótkendeı, saraptamalyq baǵalaýlarǵa sáıkes standartty qatań saqtaý arqyly kelesi kórsetkishterge qol jetkizýge bolady:
• balalardaǵy semizdik deńgeıin 10-15%-ǵa tómendetý,
•II tıpti qant dıabeti jaǵdaılary — 10-20%-ǵa,
• arterııalyq gıpertenzııa — 8-18%-ǵa,
• basqa sozylmaly aýrýlar — 5-15%-ǵa,
• sondaı-aq balalardyń zeıini men úlgerimin arttyrý.
— Dıetany jańartýmen qatar, biz mektep ashanalarynyń tamaqtaný qaýipsizdigi men sanıtarııalyq jaǵdaıyn baqylaýdy kúsheıtemiz. Memlekettik baqylaýǵa jańa tásilder engizilip jatyr: tekserýler týraly aldyn ala habarlaýdan bas tartý, turaqty monıtorıngtik saparlar júıesin engizý. Bul sharalar tamaqtaný jaǵdaılaryn obektıvti baǵalaýǵa jáne buzýshylyqtardy ýaqtyly joıýǵa baǵyttalǵan. Biz bul qadamdy balalarymyzdyń densaýlyǵy úshin jasaımyz jáne bilim berý júıesiniń barlyq qatysýshylaryn jańa talaptardy jaýapkershilikpen jáne adal oryndaýǵa shaqyramyz, — dep túıindedi mınıstr.
Buǵan deıin Bilim berý jáne densaýlyq saqtaý uıymdarynda tamaqtanýdyń standarttary ózgertilgeni habarlandy.