1 qyrkúıekte Qazaqstanda 83 jańa mektep ashylady

ASTANA. KAZINFORM – Elimizde 267 myń orynǵa arnalǵan 232 mektep salynyp jatyr. Bul týraly Oqý-aǵartý mınıstri Ǵanı Beısembaev málim etti.

- Mektep qurylysy jumystaryna toqtalsaq, qazirgi tańda 267 myń orynǵa arnalǵan 232 mektep salynyp jatyr. 1 qyrkúıekte 115 myń oqýshyǵa arnalǵan 83 jańa mektep ashylady. Jyl sońyna deıin 140 myń orynǵa arnalǵan 111 mekteptiń qurylysy aıaqtalady, - dedi Ǵ. Beısembaev Úkimet otyrysynda.

Sonymen qatar bıyl 190 myń oqýshy oqıtyn 245 mektepti jańartý jumystary atqarylyp jatyr, onyń 145-i – aýyl, 100-i – qala mektebi. 1 qyrkúıekte 99 myń oqýshyǵa arnalǵan 127 mektepte renovatsııa aıaqtalady. Bul jumystardy ýaqytyly ári sapaly júrgizý ákimdikterdiń jaýapkershiliginde. Qazirgi ýaqytta Almaty, Atyraý jáne Abaı oblystarynda jumystardy kúsheıtýdi qajet etedi.

- 2025 jyly 69 myńnan astam oqýshy bilim alatyn 1 myń aýyl mektebin modernızatsııalaý josparlanǵan. Qazirgi kezde bul jospar 733 mektepte nemese 73,3%-ǵa oryndaldy. Almaty, Jambyl, Mańǵystaý, Túrkistan, Batys Qazaqstan jáne Shyǵys Qazaqstan oblystarynda modernızatsııalaý josparynyń tolyq oryndalmaý táýekelderi bar, - dedi mınıstr.

Budan buryn habarlanǵandaı, bıyl balabaqshalar vaýcherlik qarjylandyrý júıesine ótedi.