Búgin – halyqaralyq qarttar kúni

Búgin álem Qarttar kúni merekesin atap ótip jatyr, dep habarlaıdy QazAqparat. 

Qarttar kúni – halyqaralyq mereke. Ol 1990 jyly 14 jeltoqsanda BUU Bas assambleıasynda resmı bekitilgen.

Búginde elimizde zeınet jasyndaǵy 2,3 mıllıonnan astam qart bar. Atalǵan meıramnyń maqsaty – qarttardyń qoǵam men memleket aldyndaǵy eńbegin qurmetteý, taný, olardyń problemalary men qajettilikterine, ómir sapasyn arttyrýǵa nazar aýdarý jáne qamqor bolý.

Qazaqta qarttarǵa qatysty kóptegen ıgi sózder bar, solardyń bireri: Qarty bar eldiń qazynasy bar, Kóp jasaǵan qarııa, aqyly – teńiz-darııa, Ata – ardaqty tulǵa, Qarııasyn syılaǵan elde qasıet bar.

Qazaqstanda qart jandarǵa memleket tarapynan birqatar qoldaý kórsetiledi. Eńbek jáne halyqty áleýmettik qorǵaý mınıstrliginiń málimetinshe, bıyl Qarttar kúnine oraı Astana qalasy, Qaraǵandy, Mańǵystaý, Túrkistan, Jetisý jáne Ulytaý oblystaryndaǵy qart jandarǵa 2-den 10 AEK mólsherde, (shamamen 1,9 mlrd teńge 234 myń adam) birjolǵy materıaldyq kómek kórsetildi.

Odan bólek, Qarttar kúnine oraı Almaty, ShQO, Jambyl, Túrkistan, Abaı jáne Ulytaý oblystarynda merekelik azyq-túlik sebetteri tabystaldy. Jalpy, bıyl qart azamattardy áleýmettik qoldaýǵa shamamen 4,6 mlrd teńge baǵyttaldy.

Odan bólek, mereke kúni quzyrly organdar jáne oblys, aýdan ákimderi óńirdegi qart jandardy quttyqtap jatady. Sonymen qatar túrli formatta merekelik is-sharalar uıymdastyrylady.

Aıta ketsek, elimizde belsendi uzaq ómir súrý, densaýlyq mádenıeti jáne qoǵammen baılanys baǵyttary boıynsha «bir tereze» qaǵıdaty negizinde jumys isteıtin 79 belsendi uzaq ómir súrý ortalyǵy jumys istep tur. Ol jerde qarııalar bos ýaqytyn ótkizip, súıikti isterimen aınalysady.