1 qańtardan tirkelmegen telefonǵa baılanys qyzmeti kórsetilmeıdi - ІІM

ASTANA. QazAqparat - 2019 jyldyń 1 qańtarynan bastap abonenttik qurylǵylardy mindetti tirkeý erejesi kúshine enedi. Bul týraly QR Іshki ister mınıstrliginiń resmı ókili Almas Sadýbaev aıtty, dep habarlaıdy QazAqparat tilshisi.

«2019 jyldyń 1 qańtarynan bastap IMEI-kod + SIM-karta + tulǵa JSN-ni  syzbasy boıynsha abonenttik qurylǵylardy mindetti tirkeý erejesi kúshine enedi. Tirkelmegen abonentterge baılanys qyzmeti kórsetilmeıdi. Osyǵan baılanysty azamattar aǵymdaǵy jyldyń sońyna deıin ózderiniń baılanys qurylǵylaryn tirkeýleri qajet»,-  dedi Almas Sadýbaev.

Osy rette ІІM resmı ókili uıaly baılanys operatorlarynyń fılıaldarynda úlken kezek bolyp, qoǵamda dúrbeleń týmaýy úshin azamattarǵa qurylǵylaryn der ýaqytynda tirkeýge keńes beredi.

«Bul eń aldymen azamattardyń múddesin qorǵaý úshin jasalyp otyr. Eger bir adamnyń telefony tirkegennen keıin urlanatyn bolsa, onda baza arqyly ony kim paıdalanatyndyǵyn anyqtaýǵa bolady. Buǵan qosa, baılanys operatorlary da  bazada qurylǵynyń IMEI-kody urlanǵan retinde kórsetilip tursa baılanysqa tosqaýyl qoıý múmkindigin alady», - dedi ol.