Jezqazǵanda elimizdegi alǵashqy geologııalyq klaster salynady
2024 jyly Ulytaý oblysynda tuńǵysh geologııalyq klaster jumysyn bastaıdy. QazAqparat bul týraly Jezqazǵan ákimdiginiń baspasóz qyzmetine silteme jasap habarlaıdy.
Málim etilgendeı, Jezqazǵan óńirinde mıneraldy-shıkizat qoryn arttyrý úshin geologııalyq jumystar júrgizýge 2022-2025 jyldarǵa shamamen 11 mlrd teńgeden astam qarjy bólinedi. Búgingi kúni Ulytaý oblysy boıynsha 19 ýchaskede barlaý jumystary qolǵa alynǵan. Ol mindet «Kazakhmys Barlau» mamandaryna júktelgen.
Qazir kompanııa geologııalyq klaster qurylysyn josparlap otyr. Onyń quramyna birneshe nysan kiredi: jóndeý-mehanıka tsehi; geologııalyq mýzeıi bar oqý ortalyǵy, qyzmetkerlerge arnalǵan jataqhana, geofızıkalyq zerthana jáne jer qyrtysynyń synamalaryn saqtaıtyn qoıma. Munda ózge óńirlerden jáne shet elderden úzdik ǵalymdar shaqyrylatyn bolady.
Qurylys burynǵy «Jezqazǵangeologııa» geologııalyq ekspedıtsııasynyń aýmaǵynda júzege asyrylady. Jobanyń jalpy quny – 7 mlrd teńgege jýyq. Klasterdiń qurylysy aıaqtalǵan soń 150 adam jumyspen qamtylady.
«Geologııalyq keshen – Ulytaý oblysyna ǵana emes, jalpy Qazaqstanǵa paıdaly bolmaq. Sebebi bul – elimizdegi tuńǵysh úlken geologııalyq klaster. Endigi jyldyń birinshi toqsanynda qurylysy aıaqtalady dep josparlanǵan. Jalpy 150 oryn jumys orny ashylady. Óńirde mystan basqa da kóptegen jer qazbalary bar. Sony ary qaraı jetildirip, ǵylymı jańa tásilderdi qoldanýǵa osy ortalyq septigin tıgizedi», – dep atap ótti Ulytaý oblysynyń ákimi Berik Ábdiǵalıuly.
Jańa jobanyń sátti júzege asýy – Qabanbaı batyr yqshamaýdanynyń damýyna oń áserin tıgizbek. Qazirdiń ózinde ınvestorlardyń qoldaýymen irili-usaqty máseleler sheshimin taýyp otyr. 1 myńnan astam turǵyny bar yqshamaýdanda úılerdiń teń jarymy kógildir otynǵa qosylǵan. Jaqynda «Jaıly mektep» baǵdarlamasy boıynsha zamanaýı bilim ordasynyń qurylysy bastaldy.
«Qazirgi tańda ózderińiz bilesizder, shıkizattyń bári ne tereń ornalasqan nemese basqa elementtermen qospa retinde keledi. Onyń bárin tehnologııamen bólip alyp shyǵý úshin ǵylym kerek. Ol ǵylymdy osy Jezqazǵan óńirinde damytý qajet. Sondyqtan geologııalyq klaster sondaı oımen qurylyp jatyr», – deıdi «Kazakhmys Barlau» JShS bas dırektory Ǵalym Nurjanov.
