Kım Chen Ynnyń Reseıge 6 kúndik sapary aıaqtaldy

Soltústik Koreıa basshysy Kım Chen Yn jeksenbi kúni Reseıdegi 6 kúndik saparyn aıaqtap, óziniń brondalǵan poıyzymen úıine qaıtty, dep habarlaıdy QazAqparat Yonhap agenttigine silteme jasap.

Reseılik BAQ-tyń málimetinshe, Kım Chen Yn mingen poıyz Reseıdiń alys shyǵysyndaǵy Artem qalasynan jolǵa attanǵan. Poıyzdy birqatar reseılik sheneýnik shyǵaryp saldy, dep jazdy RIA Novostı.

K.Yn qoshtasarda qol bulǵap, qurmetin bildirdi.

Eske salaıyq, KHDR kóshbasshysy Reseı prezıdenti Vladımır Pýtınniń shaqyrýymen Reseıge barǵan bolatyn. Eki el arasynda áskerı seriktestik ornaýy múmkin degen alańdaý údep turǵan sátte, olar sársenbi kúni «Vostochnyı» ǵarysh aılaǵynda sammıt ótkizdi. Pýtın Reseıdiń Amýr oblysyndaǵy ǵarysh ortalyǵynda joǵary dárejede ótken kelissózden keıin jergilikti jańalyqtar arnasyna KHDR-men áskerı-tehnıkalyq baılanys ornaýy múmkin ekenin aıtty. Sonymen qatar ol Kım Chen Yn Reseıdiń raketalyq tehnologııalaryna asa qyzyǵýshylyq tanytqanyn málim etip, KHDR-ge derbes spýtnıgin qurastyrýǵa kómektesýge ýáde berdi.

KHDR mamyr, tamyz aılarynda orbıtaǵa áskerı tyńshy-spýtnıkti ushyrýǵa talpyndy, biraq ekeýi de sátsiz aıaqtaldy. Al úshinshi tyńshy-spýtnıkti qazanda ushyrýǵa bel býyp otyr.

Aıta keteıik, bul – Kım Chen Ynnyń bılikke kelgeli shet memleketke jasaǵan eń uzaq sapary. Jolǵa ketken ýaqytty eseptesek, Soltústik Koreıa kóshbasshysy Reseıde 8 kún bolǵan.