Bolat Tilepov Abaı atyndaǵy qazaq ulttyq pedagogıkalyq ýnıversıtetiniń rektory boldy

Prezıdent Ákimshiligi Іshki saıasat bóliminiń burynǵy meńgerýshisi Bolat Tilepov Abaı atyndaǵy qazaq ulttyq pedagogıkalyq ýnıversıtetiniń rektory bolyp taǵaıyndaldy, dep habarlaıdy QazAqparat tilshisi.

Abaı atyndaǵy QazUPÝ-dyń ujymyna jańa rektordy QR Ǵylym jáne joǵary bilim mınıstri Saıasat Nurbek tanystyrdy.

Bolat Tilepov tuńǵysh joǵary oqý ornynyń qabyrǵasynda dıssertatsııa qorǵap, Abaı atyndaǵy QazUPÝ zań fakýltetinde oqytýshy bolyp jumys istedi.
Jańa basshynyń elimizdiń qoǵamdyq-saıası jáne ǵylymı salalarynda tájirıbesi mol: «Strategııa» taldaý ortalyǵy» qoǵamdyq qorynyń sarapshysy, Áleýmettik-saıası zertteýler ǵylymı-zertteý ınstıtýty men Saıası tehnologııalar ortalyǵynda aǵa ǵylymı qyzmetker bolǵan.

Іshki saıasat departamentinde, Almaty jáne Astana qalalarynyń Іshki saıasat basqarmasynda, QR Qorǵanys mınıstrligi Ákimshilik departamentinde basshylyq laýazymdarynda jumys istedi.

QR Premer-Mınıstri orynbasarynyń keńesshisi qyzmetinde, Qazaqstannyń Reseıdegi elshiliginde jumys istep, QR Prezıdenti Ákimshiliginiń memlekettik ınspektory, Aqparat jáne qoǵamdyq damý vıtse-mınıstri, QR Prezıdenti Ákimshiliginiń Іshki saıasat bóliminiń basshysy laýazymdarynda qyzmet atqarǵan.
Saıasat Nurbek ýnıversıtet ujymyn 95 jyldyq mereıtoıymen quttyqtap, elimizdiń jetekshi pedagogıkalyq joǵary oqý ornynyń damýyna qosqan ólsheýsiz úlesi úshin ýnıversıtettiń burynǵy basshysy, qazirgi QR Prezıdenti janyndaǵy Ulttyq ǵylym akademııasynyń vıtse-prezıdenti Darhan Bilálovqa alǵysyn bildirdi.
Qazaqstandaǵy tuńǵysh joǵary oqý ornynyń jańa basshysyna tabys tiledi.

Mınıstr Bolat Tilepovtyń basshylyǵymen ýnıversıtet bilim berý men ǵylymı zertteýlerdiń joǵary standarttaryn jańǵyrtý men oǵan qol jetkizý jolyn jalǵastyryp, 95 jyldyq baı tarıhy bar oqý ornynyń damýyna tyń serpin beretinine senim bildirdi.