«Uly dala joryǵy-2023»: báıge jeńimpazdary anyqtaldy
Shabandozdar elordadan 1300 shaqyrymdy Túrkistanǵa jetti, dep habarlaıdy QazAqparat tilshisi.
«Uly dala joryǵy» respýblıkalyq marafon-báıgesiniń 14-kezeńi aıaqtalyp, búgin tańǵy saǵat 7:00-den bastap sońǵy 50 shaqyrymdy eńsergen 4 komanda ishinde Jetisý oblysynyń shabandozdary top jaryp, márege birinshi jetti.
Osylaısha jeńimpaz Jetisý oblysynyń komandasy bas júldege (18 000 000 teńge) ıe boldy. Aqtóbe oblysy komandasy 2-shi oryn úshin – 16 000 000 teńge, al 3-shi oryn ıegeri Almaty qalasynyń komandasy 9 000 000 teńgeni qanjyǵasyna baılaıdy.
Tóreshilerdiń sheshimimen, márege 4-inshi bolyp kelgen Abaı oblysynyń komandasyna 5 000 000 teńge beriletin boldy.
Alǵashqy tórttikke kirgen komandalardyń ýaqyt kórsetkishi:
Jetisý oblysy – 93 saǵat 47 mınýt 43 sekýnd
Aqtóbe oblysy – 95 saǵat 06 mınýt 37 sekýnd
Almaty qalasy – 104 saǵat 23 mınýt 57 sekýnd
Abaı oblysy – 112 saǵat 12 mınýt 46 sekýnd
Sonymen qatar sońǵy kezeńde Mańǵystaý oblysynyń «Adaı» jylqysy rekord jasady. «Rekord» komandasyndaǵy 21 jastaǵy Maǵjan Abdoluly 1300 shaqyrymnyń sońǵy 50 shaqyrymyn baǵyndyrýǵa tańǵy saǵat 7:10-da attanyp, Túrkistandaǵy máre syzyǵyn 08 saǵat 44 mınýt 09 sekýndta birinshi bolyp kesti. Astanadan Túrkistanǵa deıingi 1300 shaqyrymdy bastan-aıaq 1 atpen eńserýdi maqsat etken «Rekord» komandasynyń quramy Astana qalasy, Mańǵystaý men Jetisý oblystarynyń shabandozdarynan quralǵan.
Eske sala ketsek, «Uly dala joryǵy» respýblıkalyq marafon-báıgesi 5-19 qyrkúıek aralyǵynda ótti. Báıgege elimizdiń 19 óńirinen komanda qatysty. Marafonǵa qatysýshylardyń elimizdiń kıeli jerleri Joshy han, Alasha han keseneleri jáne Túrkistan qalasy sııaqty tarıhı oryndarǵa zııarat jasaý múmkindigi týdy.
Jeńimpazdardy marapattaý rásimi keshki saǵat 18:30-da «Túrkistan-arena» stadıonynda ótedi.
