Qazaqstanda aýyl sharýashylyǵy tehnıkasynyń lızıngine 20 mlrd teńge bólinedi

Qazaqstanda otandyq ózdiginen júretin aýyl sharýashylyǵy tehnıkasynyń lızıngine «Jasyl Damý» AQ qarajatynan 20 mlrd teńge bólinetin bolady. QR Premer-Mınıstri Álıhan Smaıylov Úkimettiń tıisti qaýlysyna qol qoıdy, dep habarlaıdy QazAqparat.

Prezıdent Qasym-Jomart Toqaev jaqyndaǵy halyqqa Joldaýynda aýyl sharýashylyǵy tehnıkasyn jańartý qarqynyn arttyrýdy tapsyrdy.

Bólingen qarajatqa fermerler lızıngke 500-den astam tehnıka satyp ala alady: shamamen 80 kombaın jáne 450 traktor.

Eske sala keteıik, Memleket basshysynyń tapsyrmasy boıynsha 2022 jylǵy tamyzda elimizdiń mashına-traktor parkin jańartý maqsatynda aýyl sharýashylyǵy tehnıkasynyń jeńildetilgen lızınginiń jańa baǵdarlamasy iske qosyldy.

Máselen, ótken jyly 900-ge jýyq agrarıı qysqa merzimde bastapqy jarnasyz jyldyq 6% mólsherlememen lızıngke 1 053 tehnıka satyp aldy: 176 kombaın men 877 traktor. Bul rette jańa tehnıka 2022 jylǵy egin jınaý naýqanyna ýaqytyly qatysty.

Aıta ketý kerek, lızıngke tehnıkalyq reglamentterde belgilengen ekologııalyq talaptarǵa saı keletin jáne barlyq qajetti sáıkestik sertıfıkaty bar tehnıka beriledi.

Aýyl sharýashylyǵy mınıstrliginiń derekteri boıynsha jalpy aýyl sharýashylyǵy tehnıkasynyń jeńildetilgen lızınginiń jyl saıynǵy kólemi 170 mlrd teńgeden asady.

Jańa baǵdarlama aıasynda tehnıka lızıngke 6% mólsherlememen jáne 10 jylǵa deıingi merzimge beriledi. Bir lızıng alýshyny qarjylandyrý somasy 205 mln teńgeden aspaıdy. Bir fermer jeńildikpen ózdiginen júretin 3 aýyl sharýashylyǵy tehnıkasyn satyp ala alady. Qarjylandyrýdy 2 jyl ishinde bir ret qana alýǵa bolady.