Aqtóbede jaýyn-shashyn saldarynan bir aýdandaǵy egin orý jumysy toqtady

Aqtóbede 212 myń gektar jerden dándi daqyl jınaldy. Bul jalpy egis alqabynyń teń jartysy ǵana. Qazir jaýyn-shashyn saldarynan kombaındar toqtap tur. Al dándi daqyl qaıta kóktep ketti, dep habarlaıdy QazAqparat tilshisi.

Aqtóbe oblysy boıynsha bıyl 740 myń gektardan astam jerge aýyl sharýashylyǵy daqyldary egildi. Onyń 440 myń gektarǵa jýyǵy – dándi daqyl. Búginde 212 myń gektardan astam jerden dándi daqyl jınaldy. Bul – jalpy egin alqabynyń teń jartysy. Ár gektarynan orta eseppen 10,4 tsentner ónim jınalǵan. Qazir qoımaǵa 220,4 myń tonna astyq tústi. Bul az. Sebebi jaýyn-shashyn saldarynan kombaındar toqtap tur, al eginniń bir bóligi qaıta kóktep ketken.

«Jaýyn-shashyn kóp, sharýalarǵa qıyn. Ásirese, Áıteke bı aýdanynda jaǵdaı óte kúrdeli bolyp tur. Mamandar baryp qarady. 138,1 myń ga dándi daqyldar alqabynyń tek 16,7%-y ǵana jınaldy. Aýdanda 21 tamyzdan beri jaýyn-shashyn toqtaýsyz jaýyp, egin jınaý jumystary tolyǵymen toqtady. «Qazgıdromet» RMK derekterine sáıkes, Áıteke bı aýdany boıynsha jaýyn-shashyn aılyq normadan tamyzda 136,6 mm jáne qyrkúıek aıynda búgingi kúnge 263,1% artyq túsken. Aldaǵy kúnderi taǵy da jaýyn-shashyn bolady degen boljam bar», - dedi Aqtóbe oblystyq Aýyl sharýashylyǵy basqarmasynyń basshysy Qusaıyn Sársembaı.

Dál osy Áıteke bı aýdanynda sarǵaıǵan dán qaıta kóktep ketken.

«Mundaı astyq tek mal azyǵy retinde jaramdy. Ony ótkizý máselesi ashyq kúıinde qalyp otyr. Oblys basshysy Ashat Shaharov astyq ósiretin dıqanshylardyń qıyn jaǵdaıdan shyǵýy úshin kómek kórsetip, jan-jaqty sharalar qabyldaý qajet ekenin atap ótti», - dep habarlady oblys ákiminiń baspasóz qyzmeti.

Aıta keteıik, Aqtóbe oblysynda egin alqabynyń 75,7%-y Áıteke bı, Qarǵaly, Hromtaý, Mártók aýdandarynda ornalasqan. Mundaǵy Áıteke bı aýdanynyń úlesi – 22,2%.