Kaspi basshysy Lomtadze men Bloomberg tilshisi arasyndaǵy sóztalas

Almatyda ótken «Kazakhstan Growth Forum» konferentsııasynda Kaspi.kz basshysy Mıhaıl Lomtadze men Bloomberg saıtynyń jýrnalısi Narıman Gızıtdınovtyń arasynda pikirtalas týyndady. Áńgime ekonomıkalyq saıasat pen Qazaqstandaǵy BAQ qyzmetine qatysty boldy, dep habarlaıdy QazAqparat tilshisi.

Tilshi Narıman Gızıtdınov Mıhaıl Lomtadzege: «Qazaqstan Respýblıkasy Qarjy naryǵyn retteý jáne damytý agenttiginiń kepilsiz kredıtterge qazirgi jyldyq tıimdi mólsherlemeni 56%-dan 44%-ǵa deıin tómendetýin Kaspi.kz banki qoldaı ma?», – degen saýal qoıdy.

Sondaı-aq jýrnalıst atalǵan ózgeris kompanııanyń bıznes-modeline qalaı áser etetindigine qyzyǵýshylyq tanytty.

Kaspi.kz basshysy jaýap retinde stavkany tómendetý kompanııanyń bıznes-modeline eshqandaı áser etpeıtinin málimdep, stavkany tómendetýdiń negizdemesi týraly tilshiniń ózine suraq qoıdy.

Narıman Gızıtdınov ózin retteýshi emes ekenin aıtyp, suraqqa jaýap bere almaıtynyn jetkizdi.

Odan ári Mıhaıl Lomtadze jýrnalıske Qazaqstanǵa qatysty tek jaǵymsyz dúnıelerdi baıqap, jazatynyn ashyq atap ótti. «Ekonomıkaǵa quıylyp jatqan ınvestıtsııalar týraly nege jazbasqa?», – dep usynys aıtty.

«Siz Qazaqstanǵa turaqty ınvestıtsııa quıý týraly eń bolmaǵanda, bir maqalańyzdy kórsete alasyz ba? Qazaqstan týraly tek jaǵymsyz jaıtty jazasyz. Men sizge stavkany tómendetýdiń negizdemesi týraly aıtaıyn. Qaryz júktemesin azaıtý úshin mólsherlemeni 56-dan 40%-ǵa deıin tómendetý kerek. Baǵa arzandasa taýarǵa ne bolady? Taýardy kóptep satyp alady. Stavkanyń tómendeýi men júktemeniń tómendeýi arasyndaǵy baılanys qandaı? Taýardyń baǵasy neǵurlym arzan bolsa, soǵurlym kóp satyp alynady», – dedi kompanııa basshysy.

Jýrnalıst óz kezeginde spıkerden: «Eger bári oıdaǵydaı jumys istese, mólsherlemeni tómendetý úshin retteýshiniń áreketterine saıası aralasý ne úshin qajet boldy?», – dep taǵy surady. Buǵan jaýap retinde M. Lomtadze atalǵan jaıtqa eshqandaı qatysy joq ekenin málimdedi.