Bıyl astyq qoımalary jańa ónimdi qabyldaýǵa daıyn ba
Qazaqstandaǵy astyq qoımalary 30 mln tonna ónim saqtaı alady. Bul týraly Parlament Májilisinde egin oraǵyn talqylaý kezinde Aýyl sharýashylyǵy vıtse-mınıstri Ábilhaıyr Tamabek málim etti, dep habarlaıdy QazAqparat tilshisi.
Bıyl egin jınaý naýqanynda aýa raıy jaısyz bolýyna qatysty fermerler keıbir kedergilerge tap bolǵanyna toqtalǵan vıtse-mınıstr: «Jambyl jáne Pavlodar oblystarynda bolǵan qatty ystyq pen sýdyń azdyǵy soltústiktegi uzaq jańbyrǵa ulasty. Aıta ketsek, egin egý naýqany sapaly tuqymdardy paıdalana otyryp, ońtaıly ýaqytta júrgizildi. Fermerler tyńaıtqyshtardy ýaqytynda septi, daqyldardy aramshópter men aýrýlarǵa qarsy hımııamen ýaqytynda óńdeldi. Jappaı egin jınaý jumystarynyń bastalýyna aýyl sharýashylyǵy taýaryn óndirýshiler barlyq qajet tehnıkany daıyndady», - dedi.
Onyń aıtýynsha, aýyl sharýashylyǵy taýaryn óndirýshiler egin jınaý jumystaryn ýaqtyly júrgizý úshin 426 myń tonna jeńildetilgen baǵadaǵy dızel otyny, onyń ishinde 58 myń tonna jem-shóp daıyndaý jumystaryna bólindi. Dızel otynynyń bul kólemi Energetıka mınıstrligimen birlesip kelisildi jáne kestemen bekitildi. Barlyq shyǵyndy eskere otyryp, aýyl sharýashylyǵy taýaryn óndirýshiler úshin ortasha baǵa lıtrine 250 teńge bolady. Bul naryqtaǵy baǵadan 15 paıyz tómen.
«Respýblıkada astyq saqtaıtyn nysandardyń jalpy syıymdylyǵy – 29,9 mln tonna. Onyń ishinde astyq qabyldaý kásiporyndarynda 13,1 mln tonnany, al aýyl sharýashylyǵy taýaryn óndirýshilerde 16,8 mln tonnany saqtaý múmkindigi bar. Oblys ákimdikteri astyq qoımalarynyń jańa ónimdi qabyldaýǵa daıyndyǵyn qamtamasyz etti», - dedi vıtse-mınıstr.
