Álıhan Smaıylov Ekonomıkany demonopolızatsııalaý jónindegi komıssııa otyrysyn ótkizdi
QR Premer-Mınıstri Álıhan Smaıylovtyń tóraǵalyǵymen ótken Ekonomıkany demonopolızatsııalaý jónindegi komıssııa otyrysynda munaı óndirý jáne tasymaldaý, densaýlyq saqtaý jáne temirjol ınfraqurylymyn paıdalaný salalarynda monopolııaǵa qarsy sharalardy qabyldaý máseleleri talqylandy, dep habarlaıdy QazAqparat.
Keńeste ken oryndarynyń birinen shıkizat óńdeý úshin bıtým zaýytyna jiberiletin munaı qubyry bar jeke kompanııanyń qyzmeti qaraldy. Atalǵan baǵytta osyǵan uqsas basqa qubyrlar bolmaǵandyqtan, munaıdy balama jolmen tasymaldaý múmkin emes.
Soǵan oraı kompanııa óziniń monopolııalyq jaǵdaıyn paıdalanyp, munaıdy osyndaı qashyqtyqqa tasymaldaý úshin naryqtyń basqa qatysýshylary qoldanyp otyrǵan tarıften 30 ese joǵary tarıf belgilegen.
Talqylaý qorytyndysyna sáıkes ýákiletti memlekettik organdarǵa belgilengen baǵalardyń negizdiligine taldaý jasaý jáne QR UEM Tabıǵı monopolııalardy retteý komıteti arqyly qajetti sharalar qabyldaý tapsyryldy.
Sondaı-aq jıynda AMÓZ jáne PMHZ-ǵa aýtsorsıng sheńberinde kórsetiletin birqatar servıstik qyzmetterdi zaýyttardyń óz quzyretine qaıtarý máselesi de qaraldy. Atap aıtqanda, PMHZ-da avtomatıka men qubyr jelilerine tehnıkalyq qyzmet kórsetý, sýmen jabdyqtaý jáne santehnıkalyq qyzmet kórsetý fýnktsııalaryn kásiporynnyń qaramaǵyna berýdiń birinshi kezeńi aıaqtalǵany aıtyldy. Qazirgi ýaqytta mundaı jumystar qurylys-montajdaý qyzmetteri, elektr jelileri men jeldetý júıelerine tehnıkalyq qyzmet kórsetý, júk jóneltýshiniń qyzmetteri jáne t.b. boıynsha júrgiziledi. Bul jumystar jyl sońyna deıin aıaqtalýy tıis.
Sonymen qatar jıynǵa qatysýshylar medıtsınalyq uıymdardy jabdyqtarmen jáne tehnıkamen jaraqtandyrý salasynda jumys isteıtin kásiporyndy senimgerlik basqarýdan Densaýlyq saqtaý mınıstrliginiń qaramaǵyna berý, sondaı-aq buryn memleket menshigine qaıtarylǵan temirjol kirme joldaryn paıdalaný máselelerin talqylady.
