Zyrıandyq boıjetken qoshqardy 29 ret kóterdi

ASTANA. QazAqparat - Shyǵys Qazaqstan oblysyndaǵy Zyrıan aýdanynda Naýryz merekesine oraı ótkizilgen ulttyq sport saıystary kezinde ıÝlııa Morına qoshqardy 29 ret kóterdi, dep habarlaıdy QazAqparat «Egemen Qazaqstan» gazetine silteme jasap.

Ózge ult ókilderiniń qarasy qalyń Zyrıan aýdanynda kún men teńeletin shýaqty mereke - Naýryz jyl saıyn erekshe atalyp ótiledi. Jergilikti halyqtyń da qyzyǵýshylyǵy joǵary. Ásirese qoı kóterý saıysy dástúrli túrde uıymdastyrylady. 

Bir qyzyǵy, ádette erler ǵana qatysatyn jarysqa bıyl qyz-kelinshekter de qyzyǵýshylyq tanytyp, merekelik sharaǵa jınalǵan jurtshylyqtyń kóńilin bir kóterip tastady.

Qyzdardan ortaǵa birinshi bolyp ıÝlııa Morına shyqty. «Jattyǵý zalyna baryp turamyn. 40 kelilik shtangamen 15 ret otyryp-tura alamyn. Degenmen de qoı - shtanga emes. Sondyqtan tolqyp turmyn», - degen ol aıtsa aıtqandaı kótergen jandy «shtangasyn» qolynan sýsytyp aldy.

ıÝlııadan keıin qoı kóterý kezegin alǵan Anastasııa Býrnashova tipti birqatar jigitterdi shań qaptyryp, semizdikti kóteretin jalǵyz janýardy 29 ret kóterdi.

«Naýryz merekesin erekshe jaqsy kóremin. Alańǵa qandaı baıqaý bolsa da baǵymdy synap kóreıin dep kelip edim. Qoshqar kóterý saıysynyń ótetindigin bilgende bas tarta almadym», - deıdi ol.

Zyrıandaǵy dámhanalardyń birinde daıashy bolyp jumys isteıtin shymyr boıjetken bos ýaqytynda bodıbıldıng, paýerlıftıng jáne fıtnespen shuǵyldanatyn kórinedi. Al erler arasynda Qazaqstannyń úsh dúrkin chempıony, qaladaǵy sport mektepteriniń biriniń aýyr atletıka boıynsha jattyqtyrýshysy Shahmamed Ýmýdov qarsylas shaq keltirmeı, bir mınýtta 42 ret kóterip, jarys jeńimpazy atandy.