«Zymyrannan kelgen zııandy Reseı sozbalańǵa salyp otyr» - baspasózge sholý
*** «Elbasy Nursultan Nazarbaev jumys saparymen Atyraý oblysynda boldy», dep jazady «Egemen Qazaqstan» gazeti. Sapar barysynda QR Prezıdenti Atyraýdaǵy bilim ordalarynda, jańadan ashylǵan kásiporyndarda bolyp, jurtpen, jergilikti kásipkerlermen kezdesý ótkizgen.
«Damyǵan 30 eldiń qataryna kirýdi maqsat tutqan Qazaqstannyń ekonomıkasynyń ósimi jylyna kem degende 4%-dy quraýy tıis. Elbasy mundaı maqsatqa qol jetkizý úshin tek ekonomıkany ǵana emes, sonymen birge, mádenıetti, áleýmettik salany, bilimdi jáne medıtsına sekildi áleýmettik salany qosa damytý qajet ekenine toqtala kele, «Máńgilik El» bolý - ata-babamyzdyń armany. Bul armandy babalarymyz kóktasqa qashap jazyp ketken. Búgin biz eń ósken, óngen, óreli elderdiń qataryna qosylýdy maqsat tutyp otyrmyz», dep erekshe ekpin túsirdi.
- Bizdiń elimizdiń ataýynda Ortalyq Azııanyń basqa elderindegi sııaqty «stan» degen jalǵaý bar. Sonymen bir mezgilde, sheteldikter halqy nebári 2 mıllıondy quraıtyn Mońǵolııaǵa qyzyǵýshylyq tanytady, biraq onyń ataýynda «stan» jalǵaýy joq. Sirá, elimizdiń ataýyn ýaqyt óte kele «Qazaq eli» dep ózgertý máselesin qarastyrý kerek shyǵar, biraq aldymen mindetti túrde halyqtyń talqysyna salynǵany jón, - dedi el Prezıdenti Atyraý oblysy jurtshylyǵymen kezdesýinde. Elimizdiń birlik pen toleranttylyqty saqtaı otyryp, alǵa qoıǵan barlyq maqsattarǵa jetetindigine senim bildire kele, Nursultan Nazarbaev: «Bizdiń artyqshylyǵymyz - kópetnosty halqymyzdyń áralýandylyǵynda», dep qorytyndylady kezdesýdi», - delingen «Qazaq Eliniń qazynaly qıyrynda» atty maqalada.
***
«Aıqyn» respýblıkalyq basylymynyń búgingi sanynda «Zymyrannan kelgen zııandy Reseı sozbalańǵa salyp otyr» degen taqyryppen ózekti materıal jarııalandy. Maqala «Qazǵarysh» agenttiginde QR Úkimet basshysynyń orynbasary Baqytjan Saǵyntaevtyń qatysýymen ótken alqa otyrysyndaǵy keleli máseleler jaıynda. Basylymnyń habarlaýynsha, bıylǵy jyl otandyq ǵarysh salasynyń jylnamasyna altyn áriptermen jazylýy múmkin: amanshylyq bolsa, el tarıhynda tuńǵysh ret bir jylda úsh birdeı qazaqstandyq ǵarysh apparaty kók seńgirine jol tartady!
Sonymen qatar Qazaq jerine zymyran geptıliniń saldarlary jaıynda da sóz qozǵaldy.
«Aıtqandaı, Úkimet basshysynyń birinshi orynbasary B.Saǵyntaev «Proton-M» zymyranynyń qulaýynan kelgen zııandy óteý jumystaryn Reseıdiń sozbalańǵa salyp otyrǵandyǵyn aıtty.
- «Baıqońyr» kesheni aýmaǵyndaǵy ózekti másele - ekologııalyq problemalar, - dedi Baqytjan Saǵyntaev, - zymyrannyń árbir ushyrylýy halyq arasynda áleýmettik narazylyq týǵyzady. Osyǵan baılanysty biz Qazaqstannyń Ekologııalyq kodeksin «Baıqońyr» aýmaǵynda da taratý, qoldaný týraly másele kótergenbiz. Jáne «Proton» apatynan qorshaǵan ortaǵa kelgen shyǵyndy eseptedik. Alaıda kúni búginge deıin osy eki máseleniń sheshimi sozbalańǵa salynýda, - degen ol Qorshaǵan orta mınıstrligine, múddeli memorgandarmen birlesip, Baıqońyr boıynsha «Jol kartasy» aıasynda osy jumystardy belgilengen merzimderde bitirýdi tapsyrdy. Bul rette Qazaqstan «Proton» qulaýynan kelgen shyǵyndy 13 mıllıardtan astam teńgege (shamamen 90 mln dollarǵa) baǵalap otyr. Buǵan kelispegen RF úkimeti «Roskosmosqa» tól saraptamasyn ótkizýdi, qazaqstandyq eseptemelerdiń durystyǵyn tekserýdi tapsyrǵan. Biraq bul is ilgerilemeı turǵan kórinedi», - delingen maqalada.
***
«Sańlaqtar medalderdi sarapqa salatyn kún keldi» dep habarlaıdy «Túrkistan» basylymy «Erteń Aq Olımpıadanyń alaýy tutanady» atty maqalasynda.
«Qazaqstandyq sportshylar bul baıraqty básekede jankúıerlerdi jerge qaratpaıdy, Olımp shyńyn baǵyndyryp, kem degende eki medal qorjynymyzǵa túsedi degen boljam da jasalýda. Alaman dodada qazaqstandyq shańǵyshy Alekseı Poltaranın altyn alady degen úmitimiz bar. Konkıshi Denıs Kýzınniń de júldeli orynnan kórinetinine senim mol. Bul ázirge boljam ǵana. Degenmen, sportshylarymyzdan Sochıde ańyzǵa bergisiz jeńister kútetinimiz jasyryn emes. Tek baby emes, baǵy jansyn dep tileıik!
Árıne, «artyq aıtyp, semiz shyqqanǵa» ne jetsin! Mánerlep syrǵanaýdan úzdik nátıjelerge ıe bolyp júrgen Denıs Tenniń de shyǵar bıigi alda. Keıbir boljam jasaýshylarymyz Denıs Tenniń de júldeli orynmen oralýyna úmitti. Muz ústinde ásem órnek salatyn talantty sportshynyń júldeli orynmen oralǵanyn tileıtin jankúıerler az emes. Qarshadaı balanyń Olımp shyńyn baǵyndyrǵany qazaq eliniń abyroıy. Mánerlep syrǵanaýdan Denıs Tenmen birge Abzal Raqymǵalıev ta óner kórsetedi», - deıdi atalmysh materıaldyń avtory.
***
Prezıdent elimizdiń ataýyn "Qazaq eli" dep ózgertý týraly usynysyn búgin «Ekspress-K» basylymy da oı eleginen ótkizip kórgen. «Prezıdent predlojıl pereımenovat Kazahstan» atty maqalada. Sondaı-aq, Memleket basshysynyń Atyraý oblysyna jasaǵan sapary jaıynda egjeı-tegjeıli toqtalady. Gazettiń jazýynsha, Elbasy bul kúni jergilikti qaladaǵy Nazarbaev zııatkerlik mektebinde jáne otandyq munaı óńdeý zaýytynda bolyp, halyqpen emen-jarqyn suhbattasqan.