Zymyran bólshekteriniń qulaýynan mert bolǵandar tehnıka qaýipsizdigin saqtamaǵan - Atamqulov

ASTANA. QazAqparat - Jezqazǵan mańynda «Soıýz 2.1a» zymyran tasyǵyshy bólshekteriniń qulaýy saldarynan mert bolǵan azamattar tehnıka qaýipsizdigin saqtamaǵan. Bul týraly búgin Úkimet otyrysynan keıin BAQ ókilderine QR Qorǵanys jáne aeroǵarysh ónerkásibi mınıstri Beıbit Atamqulov málim etti, dep habarlaıdy QazAqparat.

«Eń birinshiden, 2 azamat tehnıka qaýipsizdigin saqtamaǵan. Olar Reseıdiń kásiporyndarynda jumys isteıdi, qyzmeti de soǵan baılanysty. Bólshekter qulaǵan kezde nelikten eki adam ǵana barǵan? Basqa qyzmettegi adamdar qaıda boldy? Órt sóndiretin qyzmetshiler qaıda? Másele kóp. Olar órttiń arasyna kirip ketip, ot mashınanyń benzın bagyna tıgen.  Buǵan qosa sol ýaqytta aýa raıy da qolaısyz boldy. Daýyl kóterildi, Astananyń ózinde de aptap ystyq boldy. Daladaǵy shóptiń bári kúıip ketken edi», - dedi mınıstr.

Budan buryn habarlanǵandaı, «Roskosmos» Jezqazǵan mańynda bolǵan adam óliminiń sebebin túsindirgen edi. «Zymyrannyń qosalqy bólshekteriniń qulaý aýmaǵynda aýa raıynyń qolaısyzdyǵyna baılanysty (+34 gradýs, jeldiń uıytqýy 15m/sek) jazyq dalada ot tutandy. Turǵyndarǵa tóngen qaýip joq, órt saldary joıyldy. Órt sóndirý barysynda KamAZ avtokóligin basqarǵan  «Mashına jasaý ǴÓB» jumysshysy qaza tapty. Qatty jel turýy saldarynan KamAZ otqa orandy», - delingen Roskosmos habarlamasynda. Sonymen qatar ekinshi qyzmetkerdiń denesin kúıik shalǵan bolatyn. Onyń em-domyna arnalǵan materıaldyq shyǵyndardy reseılik «Mashına jasaý» kásiporyny óz moınyna alǵan edi. Alaıda ol qyzmetker de kóz jumdy .