Zúlfııa Súleımenova: Klımat ózgeristerine beıimdelý shuǵyl sheshimdi talap etedi

ASTANA. QazAqparat- Ekologııa jáne tabıǵı resýrstar mınıstri Zýlfııa Súleımenova klımattyq ózgeristiń qandaı saldary bolatynyn túsindirdi, dep habarlaıdy QazAqparat tilshisi.

«Klımattyq ózgerister saldary Ortalyq Azııa aýmaǵyn shóleıtke, bıologııalyq sanalýandyqtyń, muzdyqtardyń azaıýyna, sý resýrstarynyń sarqylýyna jáne ekstremaldy gıdrologııalyq qubylystarǵa alyp keledi. Atalǵan máselelerdi sheshýde bizden klımattyń ózgerýine beıimdelý jáne saldaryn azaıtý boıynsha shuǵyl sheshim qabyldaýdy talap etedi», - dedi Zýlfııa Súleımenova elordada ótip jatqan III ECOJER halyqaralyq kongresinde.

Mınıstrdiń aıtýynsha, klımat ózgerisi problemalaryn sheshýdegi halyqaralyq damý trend ındýstrııalyq kún tártibinen klımattyq kún tártibine kóshý.

«Búginde kómir salasyna ekonomıkalyq qysym kúsheıip keledi. Іri qarjy ınstıtýttary jasyl tehnologııanyń paıdasyna kómirmen baılanysty jobalardan múldem bas tartty. Osy oraıda álem ekonomıasyn dekarbonızatsııalaýdyń turaqty úrdisi baıqalady», - deıdi vedomstvo basshysy.

Sondaı-aq, Zúlfııa Súleımenova Qazaqstan Parıj kelisimi maqsatyna jetý jolynda jahandyq kún tártibin tolyǵymen qoldaıtynyn aıtty.

«Onyń dáleli - elimizdiń 2060 jylǵa deıin kómirtegi beıtaraptyǵyna qol jetkizý strategııasyn bekitýi. Strategııada birneshe mańyzdy baǵyt qarastyrylǵan», - dep tolyqtyrdy ekologııa mınıstri.

Buǵan deıin ekologııa mınıstri jalpy shyǵaryndylardyń 77 paıyzy energetıka sektoryna tıesili ekenin aıtqan edi.

Aıta keteıik, elordada III ECOJER halyqaralyq kongresi ótip jatyr.