Zorlyq-zombylyq pen býllıng qurbandary úshin «111» telefon nomeri iske qosyldy

<p>Búgin Premer-Mınıstrdiń orynbasary Tamara Dúısenovanyń basshylyǵymen ótken keńeste turmystyq zorlyq-zombylyq pen balalar men jasóspirimder arasyndaǵy býllıng máseleleri talqylandy.&nbsp;<a href="https://kaz.inform.kz/" target="_blank" rel="noopener">Kazinform</a>&nbsp;bul týraly&nbsp;<a href="https://primeminister.kz/kz/news/kazakstanda-otbasy-ayelder-zhane-balalardyn-kukyktaryn-korgau-maseleleri-boyynsha-biryngay-senim-telefony-iske-kosylady-25934" target="_blank" rel="noopener">primeminister.kz</a>&nbsp;saıtyna silteme jasap habarlaıdy.</p>

Eske sala keteıik, Memleket basshysy Qasym-Jomart Toqaev Qazaqstan halqyna Joldaýynda Biryńǵaı senim telefonyn uıymdastyrý jáne zorlyq-zombylyq pen býllıng qurbandaryna kómek kórsetýdiń pármendi baǵdarlamasyn ázirleý mindetin qoıǵan bolatyn.

Osy tapsyrmany oryndaý aıasynda 16 qazannan bastap turmystyq zorlyq-zombylyq pen býllıng qurbandaryna arnalǵan «111 — AMANAT» biryńǵaı memlekettik baılanys ortalyǵy iske qosyldy. 

• Táýlik boıy habarlasýǵa bolady. 
• Qalalyq nómirler men uıaly baılanys operatorlary úshin qońyraý shalý tegin.
• Qajetti kómek mátindik dıalog arqyly da kórsetiletin bolady.
• Kómek kórsetý úshin bilikti psıhologtar men zańgerler tartyldy.

Sondaı-aq árbir jaǵdaı boıynsha operatorlar «dál osy sátte» qaǵıdatyn basshylyqqa ala otyryp, jekelegen másele boıynsha keshendi kómek kórsetetin bolady. Barlyq qajetti memlekettik organ men qyzmetti mindetti keri baılanys tásilin qoldana otyryp, bir mezgilde qosý kózdelgen.

Biryńǵaı senim telefony memlekettik shuǵyl qyzmetter tizbesindegi 101, 102, 103 jáne taǵy basqa nómirlerdiń qataryna engiziledi. Bul azamattarǵa quqyq buzýshylyqtar men qylmystardyń aldyn alý arqyly jedel túrde kómek kórsetýge múmkindik beredi.

«Atalǵan sharalar azamattar, ásirese áıelder men balalar úshin qaýipsiz jaǵdaı jasaýǵa múmkindik beredi. Baılanys ortalyǵy memlekettiń ýaqytyly kómek kórsetýiniń tıimdi quralyna aınalady, sondaı-aq óńirler boıynsha asa ótkir problemalarǵa monıtorıng jasaý úshin derekter kózi bolmaq», — dedi Tamara Dúısenova.