Zorlyq-zombylyq qurbandaryna kómek beretin ortalyqtar sany 65-ke jetti

<p>ASTANA. KAZINFORM — Qazir elimizde 65 Otbasyn qoldaý ortalyǵy (OQO) jumys isteıdi. Bul týraly Mádenıet jáne aqparat mınıstrliginiń baspasóz qyzmeti málim etti.</p>

Astanada Otbasyn qoldaý ortalyqtary men qıyn ómirlik jaǵdaıda qalǵan otbasylardy erte anyqtaý boıynsha mobıldik toptar qyzmeti boıynsha 2024 jyldyń qorytyndysyna arnalǵan jıyn ótti. Іs-sharaǵa QR Mádenıet jáne aqparat mınıstrligi, QR Eńbek jáne halyqty áleýmettik qorǵaý mınıstrligi, QR Іshki ister mınıstrliginiń ókilderi qatysty.

Aıta ketý kerek, qazirgi ýaqytta elimizde 65 Otbasyn qoldaý ortalyǵy (OQO) jumys isteıdi. Ortalyqtar qazaqstandyqtarǵa túrli máselelerdi sheshýge kómek kórsetý úshin qurylǵan. OQO psıhologııalyq, zańgerlik, aqparattyq keńes beredi, jumysqa ornalasýǵa jáne biliktilikti arttyrýǵa járdemdesedi. Sondaı-aq, turmystyq zorlyq-zombylyq qurbandaryna bir aıǵa deıin ýaqytsha baspana usynady.

2024 jyldyń sáýir aıynda áıelderdiń quqyqtaryn qorǵaý jáne balalardyń qaýipsizdigin qamtamasyz etý týraly Zańnyń qabyldanýy otbasy ınstıtýtyn nyǵaıtý men turmystyq zorlyq-zombylyqtyń aldyn alýda mańyzdy qadam boldy.

— Zańnyń jańa redaktsııasy OQO qyzmetine de ózgerister engizdi — Otbasyn qoldaý ortalyqtarynyń biryńǵaı jelisi qurylyp, otbasy máselelerin sheshýde keıs-menedjment engizildi. Ortalyqtar kómekke júgingenderdiń jaǵdaıyn keshendi túrde baǵalap, ár otbasynyń jaǵdaıyna baılanysty jeke jospar ázirlep, ony júzege asyrýda, — dep túsindirdi vedomstvo.

Jańa tásilde aldyn alý sharalaryna basa nazar aýdaryldy. Qıyn ómirlik jaǵdaıda qalǵan otbasylardy erte anyqtaý úshin Mádenıet jáne aqparat, Eńbek jáne halyqty áleýmettik qorǵaý, Іshki ister, Densaýlyq saqtaý mınıstrlikteriniń mamandarynan mobıldik jumys toptary quryldy.

Sonymen qatar, memlekettik organdardyń vedomstvoaralyq ózara is-qımylynyń jedeldigi men yńǵaılylyǵy úshin áleýmettik qyzmetterdi usynýdyń ıntegratsııalanǵan modeli retinde mobıldi qosymsha ázirlendi. Qazirgi ýaqytta mobıldi qosymsha synaqtan ótýde.

Zań kúshine engen sátten bastap Ortalyqtardyń sany 33-ten 65-ke deıin ósti. 2025-2027 jyldary olardyń sanyn 208-ge jetkizý josparlanyp otyr.

Jyl basynan beri ortalyq mamandary 400 myńnan astam keńes berdi.

Ortalyqtardyń qyzmetkerleriniń biliktiligin arttyrý, sondaı-aq mobıldik toptardyń tıimdi jumysyn qamtamasyz etý úshin barlyq óńirlerde kóshpeli oqytý semınar-trenıngteri ótkizildi.

Eske salsaq, osyǵan deıin zorlyq-zombylyqtan zardap shekken 100 myńǵa jýyq áıel polıtsııaǵa júgingenin jazdyq.