«Zorlanýdan qorqyp, terezeden sekirgen»: Almatyda eki qyzǵa sot úkimi shyqty

<p>ALMATY. KAZINFORM - Almatyda boıjetkendi uryp, bopsalap, ıntımdik qyzmet kórsetýge májbúrlegen eki sottalýshyǵa qatysty sot úkimi shyqty.&nbsp;</p>

Almaty qalasy kámeletke tolmaǵandar isteri jónindegi mamandandyrylǵan aýdanaralyq sotynda tonaý, bopsalaý jáne paıdalaný maqsatynda bas bostandyǵynan zańsyz aıyrý faktisi boıynsha T. jáne N.-ǵa qatysty qylmystyq is qaraldy.

Sotpen anyqtalǵandaı, byltyr kóktemde kámelet jasqa tolmaǵan qyzdar jábirlenýshini aqsha bopsalaý maqsatynda Almatydaǵy jaldamaly páterlerdiń birine alyp kelgen. Olar qoqan-loqqy, fızıkalyq zorlyq-zombylyq kórsetý arqyly odan 100 myń teńge talap etken.

Jábirlenýshi aqshasy joq ekenin aıtyp, suraǵan aqshalaryn tabýǵa 2-3 kún suraǵan. Budan soń sottalýshylar S.-ny er adamdarmen jynystyq qatynasqa túsirý arqyly aqsha tabýǵa májbúrleý týraly sheshim qabyldaǵan. Olar ózderiniń oıǵa alǵan áreketterin júzege asyrǵan: tún ortasynan keıin páterge jábirlenýshi S.-men jynystyq qatynasqa túskisi kelgen er adam kelgen.

«Degenmen istiń baǵyty basqasha órbıdi. Jábirlenýshi páterdiń esigi qulyptaýly ekenin kórip, zorlanýdan qorqyp, ekinshi qabattan sekirip ketken. Saldarynan densaýlyǵyna ortasha aýyrlyqta zııan keldi», - delindi sot otyrysynda.

Prokýror kinálilerdi 6 jyl merzimge bas bostandyǵynan aıyrýdy surady. Alaıda sottalýshylar óz kinásin moıyndaǵan joq.

Sot úkimimen sottalýshy T. kináli dep tanylyp, oǵan 5 jyl 6 aı merzimge bas bostandyǵynan aıyrý jazasy taǵaıyndaldy. Al sottalýshy N. 5 jyl 9 aı merzimge bas bostandyǵynan aıyryldy.

Sot sottalýshylardy jábirlenýshige moraldik zalal keltirgeni úshin 3 mıllıon teńge berýge mindettedi. Sondaı-aq advokattyń qyzmetine jumsalǵan shyǵyndy óteý úshin árqaısysy 600 myń teńgeden tóleý kerek. Sot sottalýshylardyń jasyn eskerip, jazany jeńildetti. 

Úkim zańdy kúshine engen joq.