Zııatkerlik menshikti qorǵaý: 81 myńnan astam kontrafaktilik ónim aınalymnan shyǵaryldy

<p>Halyqaralyq tirkeýdi qosa alǵanda taýar belgilerin, ónerkásiptik menshik obektilerine berilgen qorǵaý qujattarynyń sany 2024 jyldyń qańtar-sáýir aılarynda 4,5 myńnan asty, bul 2023 jylmen salystyrǵanda tórtten birge artyq. Bul Qazaqstan aýmaǵynda zııatkerlik menshik obektilerin qorǵaýdy qamtamasyz etýge nıet bildirgen otandyq bıznes, halyqaralyq qoǵamdastyqtyń belsendiligin kýálandyrady. Bul týraly OKQ brıfınginde Ádilet vıtse-mınıstri Botagóz Jaqselekova málimdedi.</p>

Spıker 2022 jyly Qazaqstanda zııatkerlik menshiktiń jańa obektisi – «geografııalyq kórsetkish» engizilgenin atap ótti - ol taýarlardyń sapasyn óndirilgen jerine baılanysty ajyratýǵa arnalǵan. Byltyr 5, bıyl 1 geografııalyq kórsetkish tirkeldi.

«Ádilet organdary quqyq ıelenýshilerdiń quqyqtary men zańdy múddelerin qorǵaýǵa qatysty úlken jumys atqaryp jatyr. Aýmaqtyq ádilet organdary quqyq ıelenýshilerdiń ótinishteri negizinde basqa bireýdiń taýar belgisin zańsyz paıdalaný faktileri boıynsha sharýashylyq júrgizýshi sýbektilerdiń qyzmetin tekseredi. Tekseris nátıjeleri boıynsha qoldanystaǵy zańnama 51 ret buzylǵany anyqtaldy. Barlyq buzýshylyq boıynsha ákimshilik ister qozǵalyp, sotqa jiberildi. 11 is boıynsha 41 sýbekt jaýapqa tartyldy. Azamattyq aınalymnan 81 myńnan astam kontrafaktilik ónim alyndy», - dedi spıker.

Azamattyq aınalymnan shyǵarylatyn kontrafaktilik ónimderdiń tizimi keń. Munda turmystyq zattar, kıim-keshek, turmystyq hımııa, avtomobılderge arnalǵan qosalqy bólshekter, gadjetterdiń barlyq túri, tipti tamaq ónimderi de bar. Mysaly, sáýir aıynda Shymkent qalasynyń aýmaǵynda «Henkel AG & Co. KgaA» kompanııasynyń «METYLAN» taýar belgisin zańsyz paıdalaný deregi anyqtaldy. Tusqaǵaz jelimi satylymnan alyndy. Kináli adam jaýapqa tartyldy.

Qazaqstan bir jyl ishinde Jahandyq ınnovatsııalyq ındeks reıtınginde óz pozıtsııasyn jaqsartty. Ortalyq jáne Ońtústik Azııa elderiniń tobynda Qazaqstan Úndistan men Irannan keıin 3-shi orynda tur.