Zııandy eńbek jaǵdaıynda jumys isteıtinderdi áleýmettik qorǵaý tásilderi ázirlendi

ASTANA. QazAqparat – Eńbek jáne halyqty áleýmettik qorǵaý mınıstriniń mindetin atqarýshy Tamara Dúısenova zııandy eńbek jaǵdaıynda jumys isteıtin jumysshylardyń áleýmettik qorǵalýyn kúsheıtýge qatysty pikir bildirdi, dep habarlaıdy QazAqparat tilshisi.

«Qazaqstanda osy sanattaǵy jumysshylardy áleýmettik qamsyzdandyrý úshin 2005 jyldan bastap jazataıym oqıǵalardan áleýmettik saqtandyrý júıesi jáne 2015 jyldan bastap 50 jasynda erte zeınetke shyǵýdy kózdeıtin zeınetaqymen qamsyzdandyrýdyń kásibı shemasy engizildi.

Biraq, bul eki júıe de annýıtet boıynsha eskerilip otyr. Birinshi júıe boıynsha tólemder tek zeınet jasyna deıin júrgizilse, ekinshisinde jınaqtardyń azdyǵyna baılanysty annýıtetter barlyǵyna birdeı tarala bermeıdi. Osyǵan oraı Memleket basshysy zııandy eńbek jaǵdaıynda jumys isteıtin adamdardy áleýmettik qorǵaýdy arnaıy tólemder engizý múmkindigin qarastyrý arqyly kúsheıtý qajet ekenin aıtty», - dedi T. Dúısenova Úkimet otyrysynda Prezıdenttiń QR Parlamenti sessııasynyń ashylýynda bergen tapsyrmalaryn iske asyrý barysyn talqylaý kezinde.

Onyń aıtýynsha, osy tapsyrmany oryndaý úshin Mınıstrlik otandyq jáne álemdik tájirıbeni zerdelep, birqatar tásildi qarastyrdy. Bul turǵyda birneshe nusqa boıynsha esep-qısap júrgizdi.

«Qazirgi kezde naqty tásilder ázirlendi, ony Qarjy naryǵyn retteý agenttigi men saqtandyrý naryǵy qarap jatyr. Bul jumys aıaqtalǵannan keıin, ózara kelisilgen sheshimder Úkimet basshysynyń qaraýyna usynylady», - dedi mınıstrdiń mindetin atqarýshy.