Zııandy eńbek jaǵdaıynda jumys isteıtinderge arnaýly áleýmettik tólem tólene bastaıdy

<p>Osy jyldyń 1 qańtarynan bastap zııandy eńbek jaǵdaılarynda uzaq ýaqyt jumys istep júrgen azamattarǵa 55 jastan bastap arnaýly áleýmettik tólem tólenedi, dep habarlaıdy <a href="Kazinform" target="_blank" rel="noopener">Kazinform</a>.</p>

Aıta keteıik, ótken jyldyń 21 jeltoqsanynda Memleket basshysy «Qazaqstan Respýblıkasynyń keıbir zańnamalyq aktilerine qoǵamdyq birlestikter jáne eńbek jaǵdaılary zııandy jumystarda isteıtin adamdardy áleýmettik qorǵaý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy. Osy Zańǵa sáıkes, 2024 jyldyń 1 qańtarynan zııandy eńbek jaǵdaılarynda uzaq ýaqyt jumys istep júrgen azamattarǵa 55 jastan bastap arnaýly áleýmettik tólem engizilip otyr.

«Zańda kóp ózgerister engiziledi. Birinshiden, arnaıy áleýmettik tólem kóp jyldar boıy jumys istegen, 55 jasqa tolǵan jáne 7 jyl boıy ózderine jıyntyq jarnalar aýdarǵan azamattarǵa tólenedi. Arnaıy áleýmettik tólem tórt qarajat kózinen: respýblıkalyq bıýdjetten 2 eń tómen kúnkóris deńgeıi mólsherinde; ómirdi saqtandyrý jónindegi kompanııalardan; jumys berýshilerdiń qarajatynan, BJZQ-dan mindetti kásiptik zeınetaqy jarnalary esebinen tólenedi», - degen edi QR Eńbek jáne halyqty áleýmettik qorǵaý mınıstri Svetlana Jaqypova Ortalyq kommýnıkatsııalar qyzmetindegi brıfıngte.

Tólemderdiń ortasha mólsheri 208 myńǵa jetedi jáne 63 jasqa deıin tólenedi. Árbir jumysker úshin tólem mólsheri BJZQ-daǵy jınaqtaryna baılanysty bolady.

Arnaıy áleýmettik tólemderdi alý úshin eńbek jaǵdaılary zııandy jumystan – demalysqa nemese jeńilirek jumysqa aýysýy kerek. 2024 jyly arnaıy áleýmettik tólemge 37 myńnan astam jumysker, 2030 jyly – 58 myńnan astam, 2035 jyly – 95 myńnan astam jumysker úmitker bola alady.