Zııaly qaýym Prezıdent bastamalaryn halyqqa durys túsindirýi qajet – Serikzat Dúısenǵazy

NUR-SULTAN. QazAqparat – Aıtysker aqyn, fılologııa ǵylymdarynyń kandıdaty Serikzat Dúısenǵazy Prezıdenttiń «Qazaqstan» ulttyq telearnasyna bergen suhbatyna oraı pikir bildirdi, dep habarlaıdy QazAqparat tilshisi.

«Prezıdenttiń iske asyryp jatqan josparlarynyń durys ekendigine keshegi «Qazaqstan» ulttyq telearnasyndaǵy suhbat barysynda kóz jetkize tústik. Keı adamdardyń ony keri buryp jatqany da, ár nárseden ilik izdep otyrǵany da bar. Biraq, Memleket basshysynyń júrgizip otyrǵan saıasaty durys. Suhbat barysynda qańtar oqıǵasyna qatysty kóp jaıt tergeý bitpeı ashyq aıtylmaıtyndyǵy atap ótildi. Degenmen, negizgi máseleler egjeı-tegjeıli qozǵaldy. Sondyqtan Prezıdent atap ótken negizgi baǵyttardy zııaly qaýym ókilderi halyqtyń ortasynda, kópshiliktiń arasynda durys túsindirip, qoldaý kórsetýi kerek», - dedi aıtysker aqyn.

Onyń atap ótýinshe, zııaly qaýym ókilderi qashanda qoǵamnyń bastaýshysy, qozǵaýshysy bolyp keledi.

«Zııaly degenimiz kim? Zııalylar úlken jazýshylar men aqyndar dep qana qabyldaýǵa bolmaıdy. Olardyń ishinde ǵalymdardy, jalpy ár saladaǵy kózi ashyq, kókiregi oıaý azamattardy, ádebıettiń irgeli baǵyttaryn meńgergen azamattardy zııaly qaýym deımiz. Endi osy zııaly qaýym ne isteýi kerek? Zııaly qaýym qashanda memlekettiń durys baǵytta damýyna, halyqtyń atqarylyp jatqan jumystardyń durys túsinýine atsalysýy kerek. Durys-burysynyń arajigin ajyratyp, jurtshylyqqa jetkizip otyrýy qajet», - dedi Serikzat Dúısenǵazy.