Zııaly qaýym ókilderi bolashaq ómir týraly máseleni qazirden oı tarazysyna sala berýge tıis - Prezıdent

NUR-SULTAN. QazAqparat - Zııaly qaýym ókilderi bolashaq ómir týraly máseleni qazirden oı tarazysyna sala berýge tıis. Bul týraly Memleket basshysy Qasym-Jomart Toqaev Respýblıkalyq «Ana tili» basylymyna bergen suhbatynda aıtty, dep habarlaıdy QazAqparat tilshisi.

«Shyn máninde, ozyq oıly zııaly qaýymnyń pikiri áleýmettik shıelenis kezinde mańyzdy ról atqarady. Adamdar aqyl-parasaty arqyly ishki túısigine qulaq asyp, ózine qajetti qorytyndy jasap, ótken isten sabaq alady. Ásirese bul ejelden kele jatqan dástúri bar bizdiń qoǵam úshin óte ózekti. Pandemııa kezinde memlekettik saıasatty júzege asyrýǵa qosqan eleýli úlesi úshin barsha zııaly qaýym ókilderine, onyń ishinde akademık Tóregeldi Sharmanovqa shynaıy rızashylyǵymdy bildiremin. Sondaı-aq bizdiń belgili aqyn-jazýshylarymyz sońǵy kezdegi oqıǵalarǵa belsendirek aralasyp, jastarǵa ómirlik tájirıbesin úıretip, temirqazyq sekildi jol kórsete alady dep oılaımyn», - dedi QR Prezıdenti.

Memleket basshysy qazir búkil dúnıejúzi pandemııa saldarymen kúresip jatqanyn, álemdik ekonomıka kóz aldymyzda quldyrap, jurttyń ómir súrý salty ózgergenin jáne osy úrdister kún tártibindegi ózekti máselelerge aınalǵanyn basa aıtty.

«Mine, osyndaı kezde jas urpaqqa bedeldi aqyl-oı ıeleriniń parasatty pikiri aýadaı qajet. Bárimizdi, ásirese jastardy «Ary qaraı qalaı ómir súremiz?» degen saýal mazalaıdy. Osyndaı sátte bizdiń kózqarasymyz, bolmysymyz, osy biz ómir súrip jatqan jańa zamannyń talabyna saı bolýy kerek. ıAǵnı tarıhı turǵydan jańartylǵan qundylyqtarǵa bet burýǵa tıispiz. Bizge qazirgi zamannyń syn-qaterlerine tótep beretin aqyl-oı tujyrymy qajet. Joǵary zamanaýı tehnologııa, robottar, jasandy ıntellekt dáýirinde aqyl-keńes túsinigi erekshe mańyzdy bolmaq. Jańa zamanda ar, namys, uıat sııaqty adamı qasıetterge qajettilik bola ma? Meniń oıymsha, bul – zııaly qaýym ókilderi talqylaıtyn aýqymdy fılosofııalyq másele. Úlgi-ónege, ulttyq qundylyqtar bolmasa, mashınalar men robottar áleminde jutylyp ketetinimiz sózsiz. Bizdiń uly aqyn-jazýshylarymyzdyń shyǵarmalary da mańyzyn joǵaltady. Árıne, mundaı jaǵdaıdyń múlde bolmaǵany jaqsy. Sondyqtan zııaly qaýym ókilderi bolashaq ómir týraly máseleni qazirden oı tarazysyna sala berýge tıis», - dedi Qasym-Jomart Toqaev.