Zııabek Qabyldınov: Abaı shyǵarmasynda bizdiń ótkenimiz ben keleshegimiz jatyr

NUR-SULTAN. QazAqparat – Sh.Ýálıhanov atyndaǵy Tarıh jáne etnologııa ınstıtýtynyń dırektory, tarıh ǵylymdarynyń doktory, professor Zııabek Qabyldınov Memleket basshysy Qasym-Jomart Toqaevtyń «Egemen Qazaqstan» gazetinde jarııalanǵan «Abaı jáne HHІ ǵasyrdaǵy Qazaqstan» atty maqalasyna qatysty pikir bildirdi, dep habarlaıdy QazAqparat tilshisi.

«Budan buryn bizdiń elimizde «Rýhanı jańǵyrý» maqalasy jarııalanǵanyn bilesizder. Endeshe, eldi jańǵyrtý, tarıh taǵylymyn keleshekke shyraq etip ustaý sıpatyndaǵy ıgi isti biz Abaıdan bastaýymyz kerek. Abaı degen dástúrli qazaq qoǵamy ǵana emes, ol – kemel keleshek. Abaıdyń muralary qazaq halqynyń nemese musylman áleminiń ǵana emes, búkil adamzattyń qundylyǵy ekenin atap ótken Memelket basshysy Qasym-Jomart Kemeluly Toqaevtyń sózimen tolyq kelisemin. Sol sebepti, Prezıdent búkil álem boıynsha Abaı ortalyǵyn ashýdy tekke usynyp otyrǵan joq. Ol ortalyqtar adamdardy Abaı shyǵarmasymen tanystyryp qana qoımaı, búkil qazaq halqyn álemge tanytady», - deıdi Zııabek Qabyldınov.

Professordyń pikirine qulaq assaq, Memleket basshysynyń elordada jáne oıshyldyń týǵan jerinde eki iri konferentsııa ótkizý týraly bastamasynyń mańyzy zor.

«Ol jıyndarǵa eldegi búkil abaıtanýshylar men ǵalymdar jınalyp, Abaı shyǵarmalary búkil álemge keńirek nasıhattala túsedi. Abaı shyǵarmalaryn álemniń birneshe tiline aýdarý bastamasyna erekshe úmit kútemin», - deıdi ol.

Zııabek Qabyldınov sonymen qatar, abaıtaný ǵylymyn órkendetý, oıshyldyń taǵylymyn urpaq sanasyna sińirý boıynsha da pikirin bildirdi.

«Osydan birneshe jyl buryn joǵary synyptarǵa arnap «Bizdiń Prezıdent» atty kitap jaryqqa shyqqan bolatyn. Kitap qarapaıym ári túsinikti tilmen jazylǵan. Elbasynyń ómiri men eńbegi týraly baıan etedi. Meniń oıymsha, osy ádispen «Meniń Abaıym» atty ártúrli tilde kitap jazý kerek. Abaı Qunanbaıulynyń kim ekenin árbir oqýshy bilýi tıis. Bul kitaptar júz myńdaǵan danamen oqyrmanǵa, eń aldymen joǵary synyptaǵy oqýshylarǵa tarasa ıgi bolar edi», - deıdi tarıhshy.

Zııabek Qabyldınovtyń aıtýyna qaraǵanda, uly aqynyn ulyqtaı bilgen eldiń rýhanııaty da myǵym bolmaq.

«Árbir kitaphanada Abaıdyń shyǵarmalary jarııalanǵan kitaptar men Muhtar Áýezovtyń «Abaı joly» kitaby turýy kerek degen Prezıdenttiń pikirin kóńilimnen shyqty. Sebebi, Abaıdyń shyǵarmasynda qazaqtyń búkil ómiri, minez-qulqy men kózqarasy kórinedi. Sol sebepti, qazaq halqy Abaıdy budan da tereń tanyp, keleshegine senimi nyǵaıa túser degen oıdamyn», - dedi ol.

Eske sala ketsek, «Egemen Qazaqstan» gazetiniń búgingi sanynda QR Prezıdenti Qasym-Jomart Toqaevtyń «Abaı jáne HHІ ǵasyrdaǵy Qazaqstan» atty maqalasy jarııalanǵan bolatyn.