Zırat basyndaǵy qulpytasqa QR-kod ornatý synaq retinde jasalǵan

ASTANA. QazAqparat – Qazaqstan musylmandar dinı basqarmasynyń baspasóz hatshysy Aǵabek Qonarbaıuly zırat basyndaǵy qulpytasqa QR ornatýǵa qatysty pikir bildirdi, dep habarlaıdy QazAqparat tilshisi.

«Jalpy QR - álemniń damyǵan elderiniń bárinde bar tájirıbe. Máselen, zırat basyndaǵy qulpytasqa QR ornatylady. Osy QR-ǵa uıaly telefondy jaqyndatyp, ómirden ozǵan azamat týraly tolyq málimet alýǵa bolady.

Aıtalyq, qandaı adam, nendeı qyzmet istegen, qandaı ónegeli isteri bar, qaı óńirdiń týmasy degen syndy saýaldarǵa qatysty tolyq maǵlumat ala alasyz. Osy úshin jasalǵan dúnıe. Bul tájirıbe retinde elordadaǵy shamamen 20 zırattaǵy qulpytasqa ornatylǵan», - dedi Aǵabek Qonarbaıuly QazAqparat tilshisine.

Onyń atap ótýinshe, qulpytasqa QR ornatý azamattyń ótinishi bolǵan kezde ǵana jasalady.

«Al, jappaı qoldanysqa engizilgen joq. Joǵaryda aıtqanymdaı, mundaı úrdis damyǵan elderde bar. Sondyqtan bizde de tájirıbe, synaq retinde jasalǵan», - dedi ol.