Zımbabve Qazaqstannyń kólik-kommýnıkatsııa jelilerin jańǵyrtý tájirıbesine qyzyǵýshylyq tanytty
"Qazaqstandyq kásiporyndar Zımbabve aýmaǵynda paıdaly qazbalardy óndirý jónindegi birlesken jobalarǵa qatysa alar edi. Kólik-kommýnıkatsııa jelilerin jańǵyrtýda yntymaqtastyq úshin áleýet bar ekendigin de atap ótkim keledi. Búgin bul jaıynda sóılestik jáne Zımbabve bul turǵyda tájirıbemizdi alýǵa daıyn", - dedi Memleket basshysy.
QR Prezıdenti zımbabvelik áriptesimen jahandyq kúntártiptegi máselelerdi talqylaǵandyǵyn jáne kóptegen ózekti máselede kózqarastary saı keletindigin atap ótti.
"Harare tarapynyń Qazaqstannyń halyqaralyq bastamalaryna qoldaý bildirýin baǵalaımyz. Biz úshin Zımbabve daýysy mańyzdy. Óıtkeni, ol - negizgi óńirlik el, Afrıkalyq odaqtyń yqpaldy múshesi, BUU-nyń belsendi qatysýshysy. Biz BUU men BUU Qaýipsizdik keńesi aıasyndaǵy ózara is-qımyl men tájirıbe boıynsha birlesken jumysymyzdy jalǵastyrýǵa nıetti ekendigimizdi qýattadyq. Sonymen qatar biz elderimiz Qazaqstan baıqaýshy bolyp sanalatyn Afrıka odaǵy aıasynda tyǵyz jumys isteıtin bolamyz dep ýaǵdalastyq", - dedi Nursultan Nazarbaev.
Sonymen qatar Memleket basshysy Zımbabve Prezıdentiniń Astanaǵa birinshi resmı sapary eki eldiń de túrli saladaǵy tyǵyz yntymaqtastyqty damytýǵa umtylatyndyǵyn kórsetetindigin basa aıtty.
Emmerson Mnangagvanyń aıtýynsha, sońǵy 20 jyl boıy Amerıka men Eýropa elderi sanktsııasynyń qursaýynda bolǵan Zımbabveniń ekonomıkasy búginde quldyrap ketken. Sondyqtan el ekonomıkasyn jańǵyrtýǵa bet burmaq. Osy rette zımbabvelikter Qazaqstannyń ekonomıkany ındýstrııalandyrýdaǵy tájirıbesine asa qyzyǵýshylyq tanytyp otyr.
"Zımbabve Qazaqstan osydan 20 jyl buryn bolǵan kezeńde tur. Sondyqtan dostas elge kelip, osynaý qysqa ǵana kezeń ishinde qalaı damyǵandyǵyn úırenýimiz qajet. Sizderdiń qol jetkizgen jetistikterińizge tańdanysymyzdy jasyra almaımyz. Buǵan qosa, bizde de sizderdegideı damýdyń bolýyna tyrysamyz",- dedi Zımbabve Prezıdenti.