Zilzaladan zardap shekken Túrkııa turǵyndaryna qandaı em sharalary kórsetilip jatyr – qazaqstandyq dárigermen suhbat

ASTANA. QazAqparat – Ótken aptada Túrkııada bolǵan joıqyn zilzala qurbandarynyń sany 35 myńnan asty. Álemniń túpkir-túpkirinen kómekke aǵylǵan qutqarýshylar men dárigerler arasyna otandastarymyz da bar. Olar táýlik boıy izdestirý jumystaryn júrgizip, zardap shekkenderge medıtsınalyq kómek kórsetýde. QazAqparat agenttigi Túrkııaǵa alǵashqylardyń biri bop attanǵan QR TJM Apattar medıtsınasy ortalyǵynyń elordalyq fılıalynyń feldsheri Serikbaı Ahmetjanovpen suhbatty usynady.

Serikbaı Ahmetjanov Apattar medıtsınasy ortalyǵynda 2013 jyldan beri jumys isteıdi. Qyzmeti barysynda Astana aýmaǵy men onyń syrtynda oryn alǵan tótenshe jaǵdaılardy joıý jumystaryna qatysqan. Atap aıtqanda, órt, jol-kólik oqıǵasy, sý tasqyny jáne basqa TJ ornyna birneshe márte shyǵyp, halyqqa qajetti medıtsınalyq kómek kórsetken.

Buǵan deıin Serikbaı Ahmetjanov Densaýlyq saqtaý mınıstrligine qarasty jedel-járdem brıgadasy quramynda qyzmet atqarǵan.

«Jedel járdemde kúrdeli shaqyrýlar kóp boldy, sonyń birin aıtyp bereıin. Bir shaqyrtýda anafılaktıkalyq shok alǵan áıeldi qutqarýǵa bardyq. Sol kisige der kezinde kómek kórsetip 11-qabattan zembil túsirip, temir jol aýrýhanasyna aman-esen jetkizgenim este qalypty», - dep eske aldy dáriger.

Taǵy bir qaıǵyly oqıǵa Astanadan 70 shaqyrym jerde bolǵan. Onda júrgizýshilerdiń biri komaǵa túsip, bas súıegi synǵan. Tez arada oǵan alǵashqy medıtsınalyq kómek kórsetip, aýrýhanaǵa aman jetkizgen. Alaıda jaraqat saldarynan ol 4 kúnnen keıin aýrýhanada qaıtys bolǵan.

Odan bólek, aýa-raıynyń kúrt nasharlaýynan Aqmola oblysynyń turǵyndary boran men qar qursaýynda qalyp, aýrýhana men perzenthanaǵa jete almaı, kómekke júgingen. S.Ahmetjanov medıtsınalyq brıgada quramynda muqtaj jandarǵa kómek kórsetip, sol aýyldan 117 naýqasty, úsh júkti áıeldi evakýatsııalaǵan.

Búginde Serikbaı Ahmetjanov Túrkııa Respýblıkasynyń Gazıantep qalasynda zilzaladan zardap shekken halyqqa dárigerlik kómek kórsetýde. Onyń ata-anasy, jubaıy, balalary men týystary onyń aman kelýin tilep, kútip otyr.

«2023 jylǵy 8 aqpanda Ankara ýaqytymen saǵat 17:08-de Gazıantep qalasyna kelip qondyq. Bizdi qarsy alǵan Túrkııadaǵy Qazakstan elshiligi jatyn orynǵa ornalastyryp, erteńine oqıǵa ornyna apardy. Mundaǵy basty jumysymyz – qutqarýshylardyń densaýlyǵyn qadaǵalap, kerek jaǵdaıda shuǵyl medıtsınalyq kómek kórsetý, jergilikti halyqqa da em-dom jasaý, olardy jylyný oryndaryna ornalastyrý. Turǵyndar kóbinese qan qysymy kóterilý, stress, kúıik alý, salqyn tııý, respıratorly aýrýlarmen júginip jatyr», -deıdi QR TJM Apattar medıtsınasy ortalyǵyǵyń feldsheri.

Aıta keteıik, sońǵy málimet boıynsha, qazaqstandyq qutqarýshylar úıindi astynan 7 adamdy qutqaryp, 88 adamnyń denesin shyǵarǵan.

QR TJM Apattar medıtsınasy ortalyǵynyń dárigerleri zardap shekkenderge táýlik boıy medıtsınalyq kómek kórsetýde. Osyǵan deıin 140-tan astam jergilikti turǵynǵa, sonyń ishinde 17 balaǵa medıtsınalyq kómek kórsetildi. Olardyń ishinde strestiń jedel reaktsııasymen, salqyn tııý, tynys alý joldarynyń aýrýlarymen, sondaı-aq ártúrli jaraqattarmen baılanysty aýrýlar basym.

Foto:QR TJM