Ziltemirshi Farhad Harkıge Aqtóbeden úı berildi
Rıo Olımpıadasyna Aqtóbe oblysy atynan qatysyp, qola júldege ıe bolǵan ziltemirshi Farhad Harkıge ótken jyly 1 bólmeli páterdiń kilti tabys etilgen bolatyn. Al búgin Aqtóbe oblysy ákiminiń orynbasary Erbol Nurǵalıev páterdiń kiltin berip, baspanaǵa eýrojóndeý júrgizilgenin aıtyp berdi.
«Olımpıada júldegeri Farhad Harkıge ótken jyly páter sertıfıkaty berildi. Ortaq sheshimmen páterge eýrojóndeý júrgizilip, jabdyqtaldy. Jańa syıdy Táýelsizdik kúni tabys etýdi jón kórdik. Memleket el úshin eńbek etip júrgen azamattaryn baǵalaıdy»,- dedi Erbol Nurǵalıev.
Ziltemirshi Farhad Harkı Qazaqstan qurama komandasynda jattyǵady. Aqtóbelik kásipker Talǵat Baımashevtiń qamqorlyǵyndaǵy sportshy endi Aqtóbege kelip, óńirde turady. Ony Erbolat Urqashbaev jattyqtyrady.
«Men qazaqstandyqtarǵa alǵys aıtamyn. Qazaqstandy táýelsizdik kúnimen quttyqtaımyn!» - dedi F.Harkı. Ziltemirshi qazir Azııa oıyndary men álem birinshiligine daıyndalyp jatyr. Ol aldaǵy Olımpıadada altyn alyp, eldi qýantý úshin baryn salatynyn aıtty. «Aldymen Olımpıada altyny, keıin otbasyn qurý týraly oılanamyn»,- edi ziltemirshi.
Aqtóbelik sport sheberleri, ziltemirshiler Farhad Harkıge úlken úmit artyp otyr. Onyń altyn medal alatyn qasıetterin tizbektep berdi.
«Farhadqa kóp úmit artamyz. Ony 5-6 jyldan beri tanımyn, baqylap júrmin. Tipti jattyǵýlaryna qatysyp, qarap, kúshin bildim. Farhattyń tehnıkasy myqty, beli men aıaǵy myǵym. Tek oǵan qazaq jigitterine tán júrek kerek. Julqa, serpe kóterýi myqty. Altyn ákeletin bala», - ziltemirshi, sport ardageri Qadirjan Іzǵalıev.