Jyrshy Uljan Baıbosynovaǵa Frantsııanyń ordeni tabys etildi

ALMATY. QazAqparat - Frantsııanyń Qazaqstandaǵy Tótenshe jáne Ókiletti Elshisi Fılıpp Martıne tanymal qazaq jyrshysy Uljan Baıbosynovaǵa «Frantsııa ádebıeti men óneriniń kavaleri» ordenin saltanatty túrde tabys etti, dep habarlaıdy QazAqparat tilshisi.

Frantsııa Elshisi ordendi Almatyda ótken «Uly dala eli» etnofestıvalinde saltanatty túrde tapsyrdy. Ol Frantsııa Mádenıet mınıstriniń arnaıy tapsyrmasymen Eýropadan joldanǵan qurmetke qazaq jyrshysy laıyq ekenin aıtty.

 

«Uly dala eli» etnofestıvali tamasha joba. Búgingi keshte maǵan Qazaqstannyń ońtústik óńirinen kelgen jyrshylar men Qaraqalpastannan kelgen ónerpazdyń oryndaýyndaǵy jyrlar qatty unady. Olardyń daýysy men mýzykalyq aspapta oryndaýy sheber shyqty. Men búgingi keshke Astanadan Uljan Baıbosynova úshin keldim. Ol Frantsııamen, Qazaqstandaǵy bizdiń elshilikpen birge burynnan jumys istep kele jatyr. Onyń eńbegi zor. Frantsııada Ortalyq Azııa mýzykasyn súıip tyńdaıtyndar kóp. Onyń ishinde qazaq áni tyńdarmandarynyń klýby bar», - dedi Frantsııa Elshisi QazAqparat tilshisine bergen suhbatynda.  

 

Uljan Baıbosynova «Uly dala eli» jobasy jaýapkershiligi zor joba ekenin jetkizdi.

 

«Jyrshylyq, jyraýlyq ónerdiń qanshalyqty tereń ekeni belgili. Sol sebepti buǵan úlken jaýapkershilikpen qaraýǵa týra keledi. Tereń maǵynaly murany baǵasyn túsirmeı halyqqa jetkizý basty muratymyz boldy. Barlyq qazaqqa ortaq óner bolǵandyqtan búgingi kúngi oryndaýshylary men izin jalǵastyrýshy urpaqtaryn qamtý qajet», - dedi Uljan Baıbosynova.  

 

Aıta keteıik, Almatydaǵy M. Áýezov atyndaǵy Memlekettik akademııalyq drama teatrynda  «Uly Dala eli» atty halyqaralyq jyrshylar festıvali boldy. Jyr keshi «Rýhanı jańǵyrý» baǵdarlamasy aıasynda Almaty qalalyq ákimdiginiń uıymdastyrýymen ótkizildi. Keshke jyr tyńdaýǵa Almaty ákimi Baýyrjan Baıbek pen óner súıer qaýym, stýdentter jınaldy. Jyr keshinde kórermen tek qazaqstandyq ónerpazdardyń ǵana emes, alys-jaqyn túrki halyqtary jyrshylarynyń da ónerin tamashalady. Naqtyraq aıtqanda, Syr, Oral, Mańǵystaý óńiriniń jyraýlyq óneriniń has sheberleri, búgingi qazaq jyrshylarynyń aqsaqaldary Hatımolla Berdiǵalıev, Bıdas Rústembekov, Óserbaı Sársenbaev  bastaǵan jyrshy-termeshilerimizben qatar, Ózbekstan, Túrikmen, Qaraqalpaq elderinen kelgen jyrshylar da óner kórsetti.