«Jyr alyby – Jambyl» respýblıkalyq hıp-hop festıvali máresine jetti

ALMATY. QazAqparat - «Jyr alyby – Jambyl» respýblıkalyq festıvali óz máresine jetti, dep habarlaıdy QazAqparat.

Otandyq hıp-hop ındýstrııanyń talantty ókilderin bir shyǵarmashylyq alańda toǵystyrǵan «Jyr alyby – Jambyl» respýblıkalyq festıvali óz máresine jetti.

Jambyldyń 175 jyldyǵyna arnalǵan jańa festıval zamanaýı formatta ótkizildi.

Festıvalge Jambyl aqynnyń murasynan qýat alǵan jas mýzykanttar qatysty.

Instagram, YouTube, Facebook áleýmettik jelileri arqyly iriktelgen qatysýshylar ónerlerin joǵary dárejede kórsete bildi. Jas talanattardyń artıstik sheberligi, sóz saptaýy, vokaldyq qabiletteri óner súıer qaýymnyń zor yqylasyna bólendi.

Qatysýshylar arasynda Qazaqstan halqy assambleıasynyń etnomádenı birlestikteriniń ókilderi: orys, belorýs, ózbek, uıǵyr jáne basqa etnostar boldy.

Olardyń barlyǵy rep jáne án partııalaryn qazaqsha oryndady.

Festıval QR Mádenıet jáne sport mınıstrliginiń uıymdastyrýymen ótti.

Bul festıvaldiń maqsaty – Jambyldyń murasyn nasıhattaı otyryp, jas talanttardy qoldaý, el aımaqtarynyń ózara shyǵarmashylyq baılanysyn nyǵaıtý.

Uıymdastyrýshylardyń aıtýynsha, Jambyldyń murasyn jastar arasynda tanymal etý, Jambyl qaldyrǵan ósıetterdi óskeleń urpaqtyń sanasyna sińirý óte mańyzdy.

Elimizdiń túkpir-túkpirinen kelip, jobaǵa qatysýshy jastar mol tájirıbe jınaǵandaryn jetkizdi.

Solardyń biri – Qostanaı qalasynan kelgen Denıs ıAkovlev. Ol Jambyldyń «Ýgaı-aı» ánin dombyramen oryndady.

- Jambyldyń zamanynda aqyndar aıtysy keńinen tarasa, qazir jastar arasynda aıtystyń jańa formasy- rep-battl tanymal. Festıval jas urpaqtyń Jambyl jyrlaryna degen jańasha kózqarasyn jetkizdi,- dedi Denıs.

Joba aıasynda jastar arasynda tanymal Kyle Ruh, Ziruza, Ray, Nei1tron, Madi Rymbaev, Soulbirkez, Esko syndy jas ártister óner kórsetip, ónerdegi erekshe jetistikterimen bólisti.

Óner jolynda tájirıbe jınap úlgergen Kyle Ruh esimimen belgili ánshi Erik Tólenov uly aqynnyń jyrlary áli kúnge deıin ózekti ekendigin aıtty.

- Jambyl atamyz jyrlaǵan mańyzdy taqyryptardy búginde jas reperler aıtyp júr. Biz Jambyldyń murasynan shabyt alyp, jastar arasynda tanymal bolatyn zamanaýı týyndylardy usynamyz,- dep jetkizdi jas ártis.

Festıval Almaty qalasynda Ó.Joldasbekov atyndaǵy stýdentter saraıynda eksklıýzıvti jańa týyndylar oryndalǵan úlken gala-kontsertpen aıaqtaldy.