Jyljymaıtyn múliktiń qaı naryǵynda baǵa túsýi múmkin

NUR-SULTAN. QazAqparat – Birikken rıeltorlar qaýymdastyǵy prezıdentiniń keńesshisi Nına Lýkıanenko elimizdegi baspana baǵasyna qatysty pikir bildirdi, dep habarlaıdy QazAqparat tilshisi.

«Meniń oıymsha, qazirgi jaǵdaıda qaıtalama turǵyn úı naryǵynda baǵanyń tómendeýi úshin alǵysharttar bar. Ekinshiden, dál qazir baspana alatyndar túrli nusqalardy qarastyrýy kerek. Páter satatyndarmen saýdalasýǵa mán bergen jón. Turǵyn úılerdi salatyndardan tikeleı baspana alý nusqalaryn da izdestirip, kelisimshart boıynsha kelissózder júrgizý kerek», - dedi N.Lýkıanenko QazAqparat agenttigine bergen jaýabynda.

Sarapshynyń paıymynsha, bul saladaǵy máselelerge syrtqy faktorlar da áser etedi.

«Turǵyn úı naryǵynda baǵanyń arzandaýyna syrtqy ári ishki jaǵdaılar yqpal etedi. ıAǵnı valıýta baǵamyna, qoldanystaǵy ıpotekalyq jobalarǵa, qurylys sektoryn qoldaý deńgeıine qatysty, sondaı-aq naryqqa tıimdi sheshimderdi engizý jolymen satyp alýshylardy qoldaý qadamdaryna baılanysty bolady. Bul turǵyda baspana alatyndarǵa bólip tóleý múmkindigin usyný, qaryz alý boıynsha tıimdi baǵdarlamalar jáne basqa da baǵyttar bolýy kerek», - dep túsindirdi Nına Lýkıanenko.

Budan buryn habarlanǵandaı, baspana naryǵynda múlikti satyp alý-satý mámileleriniń sany azaıdy .

«Sońǵy birneshe aıda, ıaǵnı 2022 jyldyń sáýirinen Biryńǵaı jınaqtaýshy zeınetaqy qorynda (BJZQ) jetkiliktilik sheginiń kólemi artqannan beri naryqtaǵy sharttardyń jalpy sany aıtarlyqtaı tómendedi», - dedi N. Lýkıanenko.

Onyń aıtýynsha, bir aıdaǵy kelisimsharttardyń jalpy sany 30-31myńǵa deıin qysqardy.