Jyljymaıtyn múlikke qarjy salatyn úlesker neni bilýi kerek

ATYRAÝ. QazAqparat – Jyljymaıtyn múlikke qarjy salatyn úlesker qurylys salýshynyń odan qarjy tartýǵa ruqsaty bar-joǵyn anyqtap alýy tıis. Bul týraly QazAqparat tilshisi Atyraý oblystyq memlekettik sáýlet-qurylys baqylaý basqarmasyna silteme jasap habarlaıdy.

Úlesker jyljymaıtyn múlikke aqsha salý týraly mámile jasamas buryn qurylys salýshydan nysanǵa qarajat tartýǵa ruqsaty bar-joǵyn naqtylaýy kerek. Ruqsat bolǵan jaǵdaıda ǵana áleýetti salymshynyń qarjylyq salymdary saqtandyrylady. «Turǵyn úı qurylysyna úlestik qatysý týraly» zańǵa sáıkes úleskerlerdiń qarajatyn tıisti ruqsat qujatynsyz qabyldaýǵa tyıym salynady. Osy oraıda, qurylys salýshylarǵa QR Ákimshilik quqyq buzýshylyq týraly kodeksiniń 320-babymen, sondaı-aq, QR Qylmystyq kodeksiniń 214-babyna sáıkes kásipkerlik qyzmettiń tyıym salynǵan túrlerimen aınalysqany úshin jaýapkershilik kózdelgenin eskertemiz. Aldyn ala brondaý, rezervteý jáne ınvestıtsııalaý, talap etý quqyǵyn berý sharttary sekildi qoldanystaǵy zańnamadan tys jasalǵan barlyq mámle jaramsyz bolyp sanalady, -

dep málimdedi basqarmanyń baspasóz qyzmeti.

Aıta ketsek, oblystyq memlekettik sáýlet-qurylys baqylaý basqarmasy qurylysy ruqsat qujattaryna saı júrip jatqan turǵyn úı keshenderiniń tizimin jarııalady. Atyraý qalasynda qazir 33 turǵyn úı kesheni salynyp jatyr. Basqarma usynǵan tizimge qaraǵanda, 8 turǵyn úı kesheniniń qurylysyn júrgizip jatqan kompanııalarda úleskerler qarjysyn tartýǵa ruqsat bar. Al, 25 turǵyn úı kesheniniń qurylysyn júrgizýshilerge mundaı ruqsat berilmegen.

Eske sala ketelik, budan buryn Atyraýda ruqsatsyz salynǵan 4 qabatty turǵyn úı buzylatynyn jazǵan bolatynbyz.