Jyljymaıtyn múlik baǵasynyń aspandaýy – búkilálemdik trend

NUR-SULTAN. QazAqparat – Jyljymaıtyn múlik baǵasynyń aspandaýy – búkilálemdik trend. Bul týraly qarasha aıyndaǵy baspana baǵasyna taldaý jasaǵan ranking.kz jazdy, dep habarlaıdy QazAqparat tilshisi.

Saıttyń málimeti boıynsha, qarasha aıynda Qazaqstanda jańa turǵyn úı baǵasy 0,6%, ıaǵnı, sharshy metri úshin 354,7 myń teńgege deıin ósken. Al qaıtalama naryqtaǵy baǵa bir aıda 1,1% nemese sharshy metri úshin 282,3 myń teńgege deıin jetken.

Osylaısha bir jyldyń ishinde jańa turǵyn úı naryǵynda baǵanyń ósýi 15,2%, qaıtalama turǵyn úı naryǵynda 23,1% bolyp otyr.

«Jalpy jyljymaıtyn múlik baǵasynyń aspandaýy – jalpy álemdik trend. Qazaqstanda bıylǵy ekinshi toqsannyń qorytyndysy boıynsha jańa turǵyn úı baǵasynyń ósýi bir jyl ishinde 11,2% bolsa, «Eýrostat» deregi boıynsha, Túrkııada, birden 33%, Chehııada 14,7%, Lıtvada 12,5%, Estonııada 11,9%, ósim tirkelgen. Lıýksembýrg pen Nıderland elinde de páter baǵasynyń ósýi deńgeıi Qazqastannan joǵary», - dep jazady ranking.kz.

Analıtıkalyq resýrs Qazaqstannyń Ulttyq banki jyldyq mólsherlemeni 9,75%-ǵa deıin kóterý arqyly ınflıatsııalyq qysymnyń áserin báseńsitkenin, sonyń arqasnyda bizdeg baspana baǵasy álemdik trend deńgeıinen áldeqaıda tómen bolyp tur degen qorytyndy jasaıdy.

«Knight Frank LLP sarapshylarynyń málimetteri boıynsha, sholýda qarastyrylǵan álemniń 150 iri qalasynyń 9-ynda úshinshi toqsannyń qorytyndysy boıynsha turǵyn úıdiń ortasha quny úshten birge ósti. Jalpy, álemde qalalardaǵy turǵyn úı baǵasy sońǵy 17 jyldaǵy eń jyldam qarqynmen ósýde. Qaralyp otyrǵan qalalar boıynsha ortasha jyldyq ósim úshinshi toqsannyń qorytyndylary boıynsha 10,6% boldy», - delingen sapartamada.

Atalǵan 150 qalanyń ishinde TMD elderinen Reseıdiń Sankt-Peterbor (15-shi oryn, jyldyq baǵanyń ósýi — 24,5%) jáne Máskeý (20-shy oryn, 22,1%) qalalary bar.

Al Qazaqstannyń iri qalalarynda úshinshi toqsannyń qorytyndysy boıynsha jańa turǵyn úı baǵasynyń jyldyq ósýi Almatyda 13, Nur-Sultanda 15,6%, Shymkentte 16,8% bolǵan. Qaıtalama segmenttegi kórsetkishter de joǵary: Almatyda 9,8%, Nur-Sultanda 27% jáne Shymkentte 54,6%.

Ranking.kz.bastapqy naryqtaǵy baǵanyń ósýi qaıtalama naryqtaǵymen salystyrǵanda tómen kórinýin memlekettik baǵdarlamalardyń tetigimen túsindiredi.