Jylytý maýsymy qashan bastalady - vıtse-mınıstr jaýaby

NUR-SULTAN. QazAqparat – QR Indýstrııa jáne ınfraqurylymdyq damý vıtse-mınıstri Qaıyrbek Óskenbaev jylýdyń qashan beriletinin aıtyp berdi, dep habarlaıdy QazAqparat tilshisi.

«Qazaqstanda jylytý maýsymy áleýmettik ınfraqurylym úshin - shamamen 1 qazanda, turǵyn úıler úshin – 15 qazanda bastalady. Jáne áleýmettik ınfraqurylym úshin – 25 sáýirde, turǵyn úıler úshin – 15 sáýirde toqtatylady. Biraq bul – qatyp qalǵan qaǵıda emes», - dedi vıtse-mınıstr Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, mamandar aýa raıynyń ózgerýine qaraı sheshim qabyldaıdy.

«Temperatýralyq parametrlerge súıenemiz. Úsh-bes kún boıy aýa temperatýrasy +8 +10 gradýsqa deıin tómendese, jylý berilýi tıis. Sáýir aıynda da úsh-bes kún aralyǵynda aýa raıy +8 +10 gradýstan ári qaraı jylysa, jylý berý toqtatylady», - dedi Q. Óskenbaev.