Jyly jaqqa ushatyn qustardyń baǵyty boıynsha qus tumaýyna qarsy ekpe jasalady
Qus tumaýy qozdyrǵyshyn respýblıkanyń basqa óńirlerine tarap ketý qaýpin boldyrmaý úshin QR AShM veterınarııalyq qadaǵalaý jáne baqylaý komıteti Qostanaı, Soltústik Qazaqstan jáne Pavlodar oblystarynyń RF shekaralas aýdandarynda, sondaı-aq Aqmola oblysynyń keıbir aýdandarynda vaktsınatsııalaýdy bastaý týraly sheshim qabyldady.
Sonymen qatar, qus tumaýyna qarsy kúres strategııasyna sáıkes jumys istep turǵan qus fabrıkalarynan 20 km radıýsta jáne jabaıy qustardyń ushý baǵyty boıynsha jeke aýlalarda úı qustaryn vaktsınatsııalaý kózdelgen.
Aıta ketý kerek, Soltústik Qazaqstan oblysynyń qus fabrıkalarynda qus ólimi faktileri tirkelgen joq.
Buǵan deıin habarlanǵandaı, joǵary patogendi qus tumaýynyń taralýyna qarsy Soltústik Qazaqstan oblysynda: qustardyń ólekselerin joıý, úı-jaılar men aýla aýmaqtaryn zalalsyzdandyrý jumystary júrgizilýde. Sondaı-aq, óńirge qustardy vaktsınatsııalaý úshin joǵary patogendi qus tumaýyna qarsy otandyq 873 myń preparat bólindi.
Elimizde búginnen bastap Soltústik Qazaqstan oblysynyń Tımırıazev, Taıynsha, Jambyl, Qyzyljar, Shal aqyn, Ǵ.Músirepov, M.Jumabaev aýdanynan tiri qus jáne ınkýbatsııalyq jumyrtqa, mamyq pen qaýyrsyn, qus eti men qus sharýashylyǵy ónimderiniń barlyq túrlerin, qustarǵa arnalǵan jemshóp pen jemshóp qospalaryn, sondaı-aq buryn paıdalanýda bolǵan qustardy kútip-baǵýǵa, soıýǵa jáne músheleýge arnalǵan jabdyqtardy shyǵarýǵa ýaqytsha shekteýler engizildi.
QR Aýyl sharýashylyǵy vıtse-mınıstri Gúlmıra Isaeva QR AShM veterınarııalyq baqylaý jáne qadaǵalaý komıtetiniń Respýblıkalyq epızootııaǵa qarsy jasaq ólgen úı qustarynyń ıelerine keltirilgen shyǵyn qunyn ortasha aılyq naryqtyq baǵa negizinde tóleıtinin, baǵany Soltústik Qazaqstan oblysy ákimdigi janyndaǵy arnaıy komıssııa anyqtaıtynyn málimdedi.
Ótemaqy alý úshin ólgen úı janaýarlarynyń ıeleri ótinish berýi kerek. Aqshalaı qarajat kartaǵa aýdarylady. Bul rette, zardap shekken janýarlardyń ólekselerine komıssııalyq akti jasalyp, resmı túrde tirkelýi qajet.
Eske sala keteıik, biz buǵan deıin SQO-nyń 7 aýdanynda qus tumaýynyń oshaǵy anyqtalǵanyn, qus tumaýynyń beleń alýyna baılanysty 10 eldimekenniń karantınge jabylǵanyn aıtqan edik.
Osyǵan baılanysty SQO-da úı qustaryna qus tumaýyna qarsy vaktsına egiletin boldy. Sondaı-aq Aýyl sharýashylyǵy mınıstrligi SQO-da qus tumaýynan qyrylǵan úı janýarlary úshin ótemaqy tólenetinin habarlady.