Jylýǵa qatysty árbir shaǵym jedel sheshilýge tıis - Jeńis Qasymbek

QARAǴANDY. QazAqparat – Qaraǵandy oblysynda jylytý maýsymy bastaldy. Alaıda turǵyndar páteri áli de salqyn ekenin aıtyp shaǵymdanýda. Óńir basshysy Jeńis Qasymbek árbir ótinishti jedel sheshýdi jáne problemalardy joıýdy talap etti, dep habarlaıdy QazAqparat tilshisi.

Apparattyq keńeste onlaın rejımde barlyq qalalar men aýdandardyń ákimderi jylý berilgeni týraly baıandady.

«Shaǵymdar kóp. PIK jumysyn baqylaý kerek. Qalalar men aýdandardyń ákimdikteri árbir jaǵdaı boıynsha jumys isteýi tıis», - dedi Jeńis Qasymbek.

Energetıka jáne TKSh basqarmasynyń basshysy Ulantaı Úsenov jylytý jaǵdaıyna kún saıyn monıtorıng júrgizilip jatqanyn aıtty.

Onyń málimdeýinshe, búgingi tańda 4545 turǵyn úı men 1084 áleýmettik sala nysandary jylýǵa qosylǵan.

Qaraǵandy, Jezqazǵan, Qarajal, Saran, Sátbaev, Temirtaý, Shahtınsk qalalarynda jáne oblystyń barlyq toǵyz aýdanynda jylý berildi.

Balqash pen Prıozersk qalalarynda jylý berý maýsymy 10 qazannan bastalady dep josparlanǵan.

Qaraǵandy ákiminiń aqparatyna saı, qala boıynsha jergilikti problemalarǵa baılanysty 11 úı jylýsyz qalyp otyr. PIK aqaýlardy joıýmen aınalysyp jatyr.

Shahanda jylý berýge jańa qazandyq daıyn.

Shahtınsk ákimi Áskerbek Haltonov qazandyqtardy jaǵý júrgizilgenin jáne 10 qazanǵa deıin tutynýshylarǵa jylý beriletinin habarlady.

Ortalyqtandyrylǵan jylýmen 70 turǵyn úıdi jáne 10 áleýmettik mádenı-turmystyq nysandy qamtamasyz etý josparlanýda.