Jylý úshin tólengen 700 mln teńgeden astam qarajat tutynýshylarǵa keri qaıtarylady
Budan buryn atalmysh komıtet birqatar óńirde tutynýshylarǵa jylýǵa tólengen qarajattyń bir bóligi qaıtarylatyny týraly habarlaǵan bolatyn.
Tabıǵı monopolııalardy retteý komıteti jáne onyń aýmaqtyq bólimsheleri barlyq óńirde jylý qýatyn esepke alý aspaby joq tutynýshylar úshin jylýmen jabdyqtaý qyzmetiniń qunyn qaıta eseptedi. Bul tabıǵı monopolııalar salasyndaǵy zańnamanyń normalaryna sáıkes júrgizildi. Qaıta esepteý nátıjesinde jylý maýsymynda (2020-2021 jyldary) nemese kúntizbelik jyl úshin (2020 jyldyń sońyna deıin) qarajatty esepteýdi qaıtarý halyqtyń jeke shotynda kórsetiledi jáne avans (saldo) túrindegi jeke jolda jazylady.
«Qazaqstannyń tabıǵı monopolııalar týraly zańnamanyń normalaryna sáıkes, tabıǵı monopolııa sýbektisi syrttaǵy aýanyń naqty temperatýrasyn eskere otyryp, jylý energııasymen jabdyqtaý boıynsha rettelip kórsetiletin qyzmettiń qunyn tutynýshylarǵa tikeleı ne tutynýshynyń turǵan jerin anyqtaý múmkin bolmaǵan jaǵdaıda jylý energııasymen jabdyqtaý boıynsha rettelip kórsetiletin qyzmetke aqy tóleý kezinde tarıfti tómendetý arqyly qaıta esepteýdi júrgizýge mindetti.
Syrttaǵy aýanyń naqty temperatýrasyn eskere otyryp, jylý energııasymen jabdyqtaý jónindegi rettelip kórsetiletin qyzmet qunyn qaıta esepteý tártibiniń ózi tarıfterdi qalyptastyrý qaǵıdasymen reglamenttelgen», delingen habarlamada.
Osylaısha, ótken 2019-2020 jyldardaǵy jylytý kezeńinde jylýmen jabdyqtaý boıynsha qyzmet kórsetetin 133 tabıǵı monopolııa sýbektisi jylý energııasynyń tólemine jalpy somasy QQS-men 736 771 070 teńgege qaıta esepteý júrgizdi:
- Nur-Sultan qalasy boıynsha - 3 818 460 teńge, bul rette Nur-Sultan qalasy boıynsha aýmaqtyq departament «Qanysh Sátbaev atyndaǵy arna» RMK «Qazsýshar» fılıaly jáne «Sapro-NAT» JShS boıynsha qaıta esepteý júrgizdi, olar Qaraǵandy, Pavlodar jáne Soltústik Qazaqstan oblystarynda qyzmet kórsetedi;
- Almaty qalasy boıynsha – 13 327 030 teńge;
- Shymkent qalasy boıynsha – 25 805 640 teńge;
- Almaty oblysy boıynsha – 8 659 900 teńge;
- Aqmola oblysy boıynsha – 39 708 450 teńge;
- Atyraý oblysy boıynsha – 8 325 040 teńge;
- Aqtóbe oblysy boıynsha – 50 624 690 teńge;
- Shyǵys Qazaqstan oblysy boıynsha – 189 998 270 teńge;
- Jambyl oblysy boıynsha – 43 108 930 teńge;
- Batys Qazaqstan oblysy boıynsha – 14 942 620 teńge;
- Qaraǵandy oblysy boıynsha – 167 298 790 teńge;
- Qostanaı oblysy boıynsha – 50 718 610 teńge;
- Qyzylorda oblysy boıynsha – 53 392 570 teńge;
- Mańǵystaý oblysy boıynsha – 3 291 000 teńge;
- Pavlodar oblysy boıynsha – 28 629 400 teńge;
- Soltústik Qazaqstan oblysy boıynsha – 22 562 880 teńge;
- Túrkistan oblysy boıynsha – 12 558 790 teńge.
«Nur-Sultan qalasy men Mańǵystaý oblysynyń Aqtaý qalasynda jylýmen jabdyqtaý qyzmetterin kórsetetin «Astanaenergosbyt» JShS jáne «MAEK-Qazatomónerkásip» JShS-ynda qaıta esepteý jáne tutynýshylarǵa qarajat qaıtarýdyń negizi joq ekenin atap ótken jón.
Barlyq tutynýshylardyń jylý energııasyn esepteý aspaptaryn qoldanýǵa aýysý qajettiligi boıynsha jylý energııasynyń naqty tutyný kólemi úshin ǵana tóleıtin bolady jáne osy tutynýshylarǵa qaıta esepteý júrgizilmeıtinin atap kórsetý qajet», delingen habarlamada.