Jylý berý maýsymyna daıyndyq qalaı: Energetıka mınıstri jaýap berdi

NUR-SULTAN. QazAqparat – Bıylǵy jylý berý maýsymyna 3,9 mln tonna kómir men 83 myń tonna mazýt qarastyrylǵan. Bul týraly «Jibek Joly» telearnasyndaǵy «Jańa ýaqyt» baǵdarlamasyna suhbat bergen Energetıka mınıstri Bolat Aqsholaqov málim etti, dep habarlaıdy QazAqparat tilshisi.

«Qys maýsymyna daıyndalýǵa óte az ýaqyt qaldy. Qazirgi tańda 80 paıyzǵa daıynbyz. Degenmen birqatar óńirde bul jumysty kúsheıtý kerek. Ózderińiz biletindeı, osy jyly Petropavl qalasynda murja qulady. Sondyqtan bul suraq erekshe baqylaýǵa alyndy. Sonymen qatar Kentaý qalasyndaǵy jylý ortalyǵy men elektr júıeleriniń tozýyna baılanysty jańartý jumystary júrgizilýde. Ony ákimdikpen birlesip júzege asyryp jatyrmyz. Sondaı-aq Semeı qalasynda kómir qoryn jınaý jumystary pysyqtalýda», - dedi mınıstr.

Bolat Aqsholaqovtyń aıtýynsha, eldegi qazandyqtardyń jartysy jylý berý maýsymyna daıyn. Al qalǵandary jóndeýden ótip jatyr.

«Qazandyqtar týraly aıtatyn bolsaq, qazir olardyń jartysy ázir. Jóndeý jumystarynyń jartysy áli alda. Qazir kómir men mazýttyń kólemi jınaqtalýda. Bıylǵy jylý maýsymyna 3,9 mln tonna kómir, 83 myń tonna mazýt qarastyrylǵan. Sonymen birge áleýmettik mazýttyń da baǵasy bekitildi. Qysqy maýsymǵa 218,6 myń tonna áleýmettik mazýt beriledi», - dep bólisti mınıstr «Jańa ýaqyt» baǵdarlamasynda.