Jylý berý maýsymy qarsańynda elektr stansalarynyń jaǵdaıy qandaı

ASTANA. QazAqparat - QR Energetıka mınıstri Qanat Bozymbaev Úkimet otyrysynda kúzgi jáne qysqy mezgilde energetıkalyq stansalardyń daıyndyǵy jaıynda baıandady, dep habarlaıdy QazAqparat.

«Qazaqstannyń energetıkalyq kásiporyndarynda aldaǵy kúzgi-qysqy kezeńge daıyndyq aıaqtalýda. Kúrdeli máselelerdi qarastyrý jáne olardy sheshý boıynsha sharalar qabyldaý úshin múddeli memlekettik organdar men kompanııalardyń qatysýymen aı saıyn salalyq selektorlyq keńester ótkizilýde. Aǵymdaǵy jyly 10 energoblokty, 61 energetıkalyq qazandyqty jáne 49 týrbınany jóndeý josparlanǵan. Qyrkúıektiń basynda 4 energoblokta, 28 qazandyqta jáne 22 týrbınada jumystar aıaqtaldy. Jalpy jumystar keste boıynsha júrip jatyr», - dep toqtaldy Bozymbaev.

Onyń sózine qaraǵanda, qazirgi ýaqytta 17,2 myń shaqyrym elektr energııasyn berý jelileri jóndelip, bul jyldyq jospardyń 71 paıyzyn qurady.

«Elektr stansalarynda 3 mln 700 myń tonna kómir qory jınalyp, bul kórsetkish byltyrǵy deńgeıden 24 paıyzǵa artyq, sondaı-aq 82 myń tonna mazýt jınaqtaldy», - dedi mınıstr.

Budan bólek ol Qaraǵandy oblysynyń aldaǵy kúzgi-qysqy kezeńge daıyndyǵyna, onyń ishinde «Arselor Mıttal Temirtaý» aktsıonerlik qoǵamynyń jylý berý ortalyǵyna erekshe nazar aýdarylyp otyrǵanyn sóz etti. Ázirlengen kestege sáıkes, 3 qazandyqty jáne 1 týrbınany jóndeýi josparlanǵan. Qyrkúıektiń basynda 2 qazannyń (№ 2, 5) jóndeý jumystary aıaqtaldy, qazirgi kezde №6 qazandyq pen (aǵymdaǵy jyldyń 22 qarashasynda aıaqtalady) №2 týrbınany jóndeý jumystary júrgizilýde.