«Jylqy» trılogııasy arqyly Máńgilik eldi keńinen tanyta alamyz - Dáýren Abaev

ASTANA. QazAqparat - «Jylqy» («Equus») atty trılogııany Qazaqstan jerinde túsirýdiń úlken tarıhı mańyzy bar. Bul týraly Feısbýktegi paraqshasynda Aqparat jáne kommýnıkatsııalar mınıstri Dáýren Abaev jazdy, dep habarlaıdy QazAqparat.

«Keshe biz «Jylqy» («Equus») trılogııasyn túsirýge daıyndyq jumystarymen tanysyp qaıttyq. Ony tanymal kanadalyq rejısser Naıobı Tompsonǵa senip, tapsyryp otyrmyz. Dál osy trılogııanyń Qazaqstan jerinde túsirýdiń úlken tarıhı mańyzy bar. Sebebi jylqynyń alǵash ret qolǵa úıretilgen jeri - ózimizdiń Uly Dalamyz, keń baıtaq qazaq jeri. Botaı mádenıeti kezinde jylqy janýarynyń alǵash ret qazirgi Qazaqstan jerinde qolǵa úıretilgeni belgili. Ony ǵylymı zertteýler de rastap otyr. Sodan beri jylqy janýary kóshpeli halyqtardyń negizgi kóligine aınaldy, ishse - qymyz, jese - et berdi. Ata-babalarymyz onymen Eýropaǵa deıin baryp qaıtty. Qazirgi ulan-baıtaq jerimizdi qorǵap qaldy. Sondyqtan «Jylqy» trılogııasynyń Uly Dalada túsiriletini - tarıhı zańdylyq»,-dep atap ótti Dáýren Abaev.

Onyń sózine qaraǵanda, jalpy, mınıstrlik halyqaralyq medıa kompanııalarmen áriptestik baılanystardy jan-jaqty damytyp keledi. «Jylqy» trılogııasy da osy saladaǵy jumystyń aıqyn kórinisi bolsa kerek.

«Trılogııa álemniń 50 memleketinde kórsetiledi. Sondyqtan atalǵan joba arqyly tarıhymyz ben mádenıetimizdiń tamyry tereń ekenin taǵy bir márte kórsetip, Máńgilik eldi keńinen tanyta alamyz dep senemin»,-deıdi mınıstr.

Budan buryn habarlaǵanymyzdaı , Aqmola oblysy Aqkól aýdanynyń aýmaǵynda «EQUUS» (Jylqy) atty derekti trıologııasynyń túsirilimine daıyndyq jumystary qyzý júrip jatyr.

Aǵymdaǵy jyly 28 tamyzda Aqmola oblysynda «EQUUS» derekti trılogııasynynyń túsirilimin bastaý josparlanyp otyr.