Jyldyń sońyna deıin 484 mlrd. teńgeniń 112 jobasy tapsyrylady

ASTANA. 20 qyrkúıek. QazAqparat - 146 mlrd. teńgeniń 22 jobasyn júzege asyrý bekitilgen merzimnen qalys kele jatyr. Bul týraly búgin Úkimette Indýstrııalandyrý kartasy jobalaryn júzege asyrýǵa arnaǵan selektorlyq keńeste QR Indýstrııa jáne jańa tehnologııalar mınıstrligi Investıtsııalar boıynsha komıtet tóraǵasynyń orynbasary Sergeı Karplıýk málim etti.

«Bıylǵy birinshi jartyjyldyqta 71,6 mlrd. teńgeniń 34 jobasy iske qosylyp, 2,3 myń turaqty jumys oryn quryldy. Jyldyń sońyna deıin 484 mlrd. teńgeniń 112 jobasy tapsyrylady. Bul turǵyda 12 myń turaqty jumys orny qamtylmaq», - dedi S. Karplıýk.

Onyń sózine qaraǵanda, jyldyń sońyna deıin josparlanǵan 146 mlrd. teńgeniń 22 jobasy bekitilgen merzimnen qalys kele jatyr jáne olardyń iske qosylýy ýaqytyly bolmaýy múmkin degen kúdik bar.

«Osy oraıda ákimdikterge tıisti tapsyrmalar berip, bul máseleni baqylaýǵa alyp, bul jobalar ýaqynda iske qosylýy úshin aldaǵy tórtinshi toqsanda barlyq qajetti sharalardy atqarý kerek», - dedi S. Karplıýk.

Óz kezeginde Úkimet basshysynyń orynbasary - Indýstrııa jáne jańa tehnologııalar mınıstri Áset Isekeshev ákimdikterge problemalyq jobalardy jyl sońyna deıin iske qosýdy, sondaı-aq bıylǵy jylǵa josparlanǵan jobalardy ýaqytyly tapsyrý úshin tıisti sharalardy qabyldaýdy tapsyrdy.