Jyldyń basynan beri «Qaztemirtrans» aktsıonerlik qoǵamy otandyq taýar óndirýshilermen 7,5 mıllıardtaı teńge somaǵa kelisimshartqa otyrdy
Bul ótken jyldyń sáıkes kezeńindegi kórsetkishten eki ese kóp, dep habarlady kompanııanyń baspasóz qyzmetinen.
«Qaztemirtrans» aktsıonerlik qoǵamy - Qazaqstan Respýblıkasynyń júk vagon parkiniń iri operatory. «Qazaqstan temir joly» ulttyq kompanııasynyń enshiles kásiporny bolyp tabylatyn kompanııa 2010 jyldyń birinshi toqsanynda satyp alynatyn taýarlardyń qazaqstandyq úlesi 29 paıyzdy shamalaıdy, al jumystar men qyzmetterdegi qazaqstandyq qamtýdyń úlesi 75 paıyzdy quraıdy dep josparlap otyr.
2009 jyldyń 12 aıynyń qorytyndysy boıynsha, kompanııa kelisimsharttarynyń 76,8 paıyzyn - otandyq taýar óndirýshilermen jáne qyzmet kórsetýshilerimen jasalǵan sharttar quraǵan, onyń ishinde, qazaqstandyq qamtýdyń taýarlar boıynsha úlesi - 22 paıyzdy, jumystar men qyzmetterdegi úlesi 66,75 paıyzdy quraǵan.
Qazaqstannyń aýmaǵy arqyly ótetin júk tasymalynyń 56 paıyzy «Qaztemirtrans» akıtsonerlik qoǵamynyń júk vagon parkimen júzege asyrylady. Kompanııa óziniń júk tasymaldaý jónindegi negizgi qyzmetinen basqa, vagondarǵa jóndeý jáne jetildirý qyzmetin, kóliktik-ekspedıtorlyq, vagondardy jalǵa berý qyzmetterin kórsetedi.