Jyldyń 100 táýligin jınalysqa shyǵyndaıtyn sheneýnikter Nazarbaevtyń shamyna tıdi

ASTANA. QazAqparat - Búgin Aqordada Qazaqstan halqyna kezekti Joldaýyn jarııalaǵan Elbasy Nursultan Nazarbaev Úkimette jáne memlekettik organdarda jınalystardyń kóbeıip ketkenin synady, dep habarlady QazAqparat tilshisi.

«Sońǵy ýaqytta uzaqqa sozylatyn Úkimette jáne memlekettik organdarda otyrystar, jıyndar eselenip, qaǵazbastylyq kóbeıip ketti. Men kelisip, Jarlyqqa qol qoıdym. Seısenbi Úkimet otyrysy, dúısenbi ózim qabyldaımyn. Beıseni Parlament otyrysy»,- dep atap ótti Elbasy.

Osy rette Memleket basshysy QR Prezıdenti Keńsesiniń basshysy Mahmud Qasymbekovten bul máseleniń baqylaýda ma ekendigin surady.

«Nursultan Ábishuly, jylyna 2380 saǵat jınalys bolady eken. Bul 100 táýlikti quraıdy. Sonda bizdiń mınıstrler, qyzmetkerler jylyna 100 táýlik jınalysta otyrady eken. Al qaǵazbastylyq azaıyp keledi. Jınalystar azaımaı otyr. Kóbine senbi, jeksenbi kúnderi de jınalys ótip jatyr», - dedi Qasymbekov. 

Qazaqstan Prezıdenti mınıstrler men qyzmetkerlerdiń jylyna 100 táýlik jınalysta otyratyndyǵyna ashýlandy.

«Sizder adamǵa jumys isteýge múmkindik bermeısińder ǵoı. Men Jarlyqqa qol qoıdym. Úkimetke seısenbi kúni baryńdar, boldy, odan keıin barmańdar. Tańerteń otyrys, tústen keıin kezdesýler. Mınıstrler, olardyń orynbasarlary, ákimder, olardyń orynbasarlary únemi osy jerde júredi. Meniń memlekettik jumysta mol tájirıbem bar. Daıyndalǵan otyrys 30 mınýt, kúrdeli  máselelerge qatysty bir saǵat ótýi múmkin. Memlekettik qyzmetshiler zańǵa sáıkes 7 saǵat jumys isteýi tıis. Qyzmetkerler túngi 12-ge deıin otyrmaýlary qajet», - dedi  Elbasy.